تحت العيون تجاعيد…شعر جيهان النجار
تحت العيون تجاعيد ..منحوته بمهارة
خيبة أمل وفراق .. وصبر وشطارة
عمر انحني طوعا .. يمكن يلاقى دليل
عليه نقوش الزمن .. والنحت بالأزميل
خطوط ومتلونة .. بالكدب والتجميل
تحكي حكايتنا
لا غش .. أو تأويل
منحوته بالحرمان .. والمحرومين مساكين
خطوط ومتكعبلة .. ناجحين على فاشلين
لما يصادف أمل .. نبعد ومش قادرين
متعودين نكسره .. بحجة التمكين
نرسم خطوط الوجع .. وسط الكلام تنهيد
تحت العيون تجاعيد
مرسومة وبدقة
تحكى عن اللى فات .. ملضومة ميت لأ
والحاضر واخدنا غياب
وبكرة بدون أحباب
الماضى كا ن قاسي
نقشها وبأحكام
وفى نحتها ناسي
ان النقوش بتدوم
كاسك خبط كاسي
فى صحة الأيام
فوق الخطوط راسي
ماليش عليها كلام
كل الخطوط مزعجة
متكرمشة بحدة
فات الأوان تتفرد .. جد على جدة
تحكى كلام من ورق
حواديت عن الشدة .
التعليقات مغلقة.