كشف حساب بقلم مدحت رياض
بقلمي / مدحت رياض
لو يوم هتحاسب في الدنيا
فهتعمل كشفين لحسابك
للباقي معاك ثانية بثانية
واللي اتعمد يومها وسابك
مين جرح صورتك قدامهم ؟
مين عطر سيرتك في غيابك ؟
مين شد ايديك وقت الضيقة
من موجة الدنيا الغلابة ؟
مين ضحكة بتطلع لو شايفك
مدهونة بغل وكذابة ؟
صدقني الحسبة كتير صعبة
وهتتعب قلبك ع الفاضي
فتعيشها وقلل أحلامك
هتكون مرتاح منها وراضي
وبلاش تحكم احسن تظلم
لا تكون جلاد ولا يوم قاضي
خليك ع الهامش واتفرج
تتعلم في دروس مجاني
وهتعرف قيمتك بصراحة
من غير ما تفكر وتعاني
وهتسمع منهم عن منهم
صدقني ده طابع انساني
اتفرج ع الصورة الواضحة
من غير مكياج ولا شئ عيرة
ولسانك دايما كون صاينه
متعومش مع الموج في السيرة
واقعد في الآخر واحسبها
وبلاش تتعذب م الحيرة
الدنيا مهيش جنة ربي
دي مجرد ايام وذخيرة
لو تفهم فعلا حقيقتها
للجنة هتاخد تأشيرة
التعليقات مغلقة.