حبر سري …
وحيد علي الجمال
حبر سري
شِعر سري
لما اعوز اكتب قصيدة
باستخبى..
وابقي ماشي
فوق حروف الكلمة تاتا
لما وحي الجمله يجي أو يعدي
مش تِعَدِي؟
أصل معني الكلمة يفرق
لو في جملة
م اللي بالك فيها دَّى
اوعي بالك يبقى أمني
احنا ملح الأرض ديه
جوه احلام التحدي
ايد بتحمي وايد بتبني
هي أرضي وهي عرضي
فاستحاله لو شكيت هتعاتبني
راح تطبطب وتجاوبني وتحاوطني
هي شِدَّة بس بكره راح تعدي
الحكايه تبقى قلبي
واللي ساكنه جوه فيه
لو كتبت أني عاشقك
تسأل المكتوب إليه
هي مين اللي ف قصايدك
شغالة بالك.. قول يابيه
أحلف الأيمان بحالها
إني ما قصد حد تاني
هي كل الحد..كله
وإللي مكتوبا إليه
تلوي بوذها
والكآبة تبقى حالها
طب يا ناس علاجها إيه؟
كل كلمه فيها شك
انت تعرف ألف حد
بس مش باين عليك
هو لازم لما أكتب جملة حلوة
يبقي باقصُد واحدة تانية؟
ياللي عمري كله فيكِ
واللي جاي بعده ليكِ
روحي فيكِ بتناديكِ
أيوه باعشق فيكِ غيرتك
بس شك الغيرة يهدم
لو نسيتِ حبي فيك
ألف واحدة ممكن اعرف؟
الكلام ده مستحيل
يعني قلبي لحد غيرك
مستحيل أبدا يميل
انتِ بالنسبالي جنة
في حدودها ألف ميل
شوفتِ واحد جوه جنة
للنيران ممكن يميل؟!
وحيد علي الجمال
سرس الليان محافظة المنوفية
جمهورية مصر العربية
التعليقات مغلقة.