اوعى تموت بدري بقلم وحيدعلي الجمال سرس الليان محافظة المنوفية جمهورية مصر العربية
ممنوع في وسط المطر
تكتب كلام في الحب
من بين سطور الورق
رافضة سطورك سطر
وإن جه في يوم الغرق
امسك في توب الستر
ممنوع تنام والقمر
مقتول في قلبك غدر
مين اللي سَرَّب خبر
إن القصيده شبر
ممنوع تقول للشجر
اني انت طرحك مر
وان فتشوك في السفر
ماتقولشي انك حر
يا فجر ليه غايب
الموج عِلي ع البر
البصره طلعت ولد
واخترت أنت الشايب
عمال اجيب بكره
والمال بقى سايب
بكره بقى ذكرى
واللي اتسرق غايب
فَنَّط بقى في الورق
قبل السهر في الحر
النخلة طرحت بلح
وبترمي جوه النهر
وانا توبي ساكنُه العرق
والفقر قالوا فقر
والدمع مني سرح
نفسي أغيب لو شهر
ايه اللي خلىٰ الشتا
يرمي الربيع في البحر
ياروحي أنا عاشقك
مين اللي غلا المهر
ممنوع اجيب سيرتك
والبعد عنك جبر
مملوكشي في ايدي
غير القلم والحبر
الكل باع وجَبَر
وانا اشتريت الصبر
وشوشت فيك الودع
وعصرت قلبي عصر
طلع حساب الزعل
بين الدفاتر صفر
فسرت حلمَك غلط
فرضوا عليك الحظر
حَمِّل بقى وجعك
واجبر بواقي الكسر
اطلب بقى حقك
أنا ضد ضد النشر
الحق دايما قوي
لابس عباية النصر
صفصافك المحني
واخد صباه م الشمس
اوعي تموت بدري
من غير ما تعمل حصر
يمكن عشان ذنبي
أصبح في حبك صفر
التعليقات مغلقة.