بلاش نيأس … حسن أبوعرب

بلاش نيأس

رسمت الحزن صفصافه
وبتقَيِّل ف عِز هاتور
زمن راجِل صبح عَيٌِل!!
وفِى عيِّل بقلب جسُور
إله الكون حكيم عادل
فليه تتغر يامغرور
وليه الحال صبَح مايل
وغابت ضحكِة البنور
وليه تماطل وليه تجادل
وأرضَك م الأساس كات بُور
وليه ياندل تتنادل
وتتوضا بماء الجُور
بلاش نكذِب ونتجَمِّل
نبيع ضمايرنا . نشهَد زور
وليه ياحق بتمَيِّل
سواقى الظلم بينَّا تدُور
حذارى ياولدى تتحول
وتصبح زى ديب مسعور
بلاش نيأس ونتعَجل
كاسات الصبر عايزَه صبُور
مسير الحاله تتعدل
وبعد العَتمَه يجِى النور
نعيش أيامنَا نتخَيِّل
ونحلم بالنعيم والحُور
وشمس خرِيفنَا تتبدِل
وتكشف كل شيئ مستور
تدُور سواقينَا تستَرجِل
وتخضَر الحروف ياسطور
بلُون الحُب تتشكل
وتهدينا أرق زهور
غلَايِل قمحِنَا تسَمبِل
وتلمَع يادهب منثور

أبوعرب