بوء الشقوق …
معوض حلمى
…. بوء الشقوق ….
بتداري حزنك
عــــني لـــيه
خلف ضـحك
مـلان دموع
عارف ملامحك
فيها إيه
مانتاش ياسوع
ولاعيشت
زي الأوليا
وانت ف زمان
الأغبيا شطبوك
مســـــــحوك
منـــــــــعوك
ترفع شكوتك
ياحزين
وإنت الأمين ..؟
طب فين
ميراثك فين ..؟
يابن الغلابه
اللي بنوها
وبيرفعوها
وبيزرعوها
وبيحرسوها
عشان ولادك
وولاد ولادك
يتهنوا بيها
كسرت جره
وطلعت بره
وشوفت نور
الله بعينك
الله يعينك
ويعمي عينك
عن سوحل
وناس عرايا
بعيون كواحل
حالفين يمينهم
يمين تلاته
لايخربوها
لاتقول كبيرك
ولاحد غيرك
هايجيب لبيرك
صوت السواقي
تروي الشـراقي
وعيون تقابل
والزرع يطرح
م النور سنابل
بس الديابه
دي دافعه مهرك
عمالة تنهش
وكاسره ضهرك
ماعرفت ليلك
من شكل ضهرك
نايم ضرير
وف قعر بير
وهموك ياهمك
إن الفقير
لازما يجوع
ويحس عسر
عشان هناك
في الجنه فوق
يسكن في قصر
سحبوك بذوق
نسيت عينيك
لون الشروق
ربطوك في طوق
عشان تدوق المر
مـن بوء الشقوق
وهما فوق
فتحوا البراح للغي
والسلعه دمك
فتحوا البراح للغي
والسلعه دمك
ــــــــــــــــــــــــــــ
بقلمي الفلاح الفصيح
معوض حلمي علي
التعليقات مغلقة.