بتعشم مين؟…
بقلم مدحت رياض
بتعشم مين ؟؟
إن أنت هتفضل قال جنبه
ولا تبعد يوم
وإنك هتطيب أحزانه
ولا يمكن ليلة يبات مهموم
لما أنت بتضحك على نفسك
وتلم الضحكة على الضحكة
وتعمل ألبوم
وتقلب فيه لبقية عمرك
علشان تفتكر
إن أنت يا عيني
ضحكت في يوم
البعد نصيب
والجرح نصيب
وإن مهما هتبعد وتقرب
فسهام العمر لابد تصيب
مكتوب لك بتعيش متغرب
وفي قلب الأهل ساعات بتغيب
بتفكر ليه وتعيش مهموم
ولا فرح بيستنى لبكرة
ولا حزن في قلب بشر بيدوم
ولا حتى اللي بيندب حظه
ده هنقول محروم
صدقني اللي بيحصل فيها
ده نصيب مقسوم
الرزق كما العمر بيوصل
بمصير محتوم
ومفيش في ايديك
غير تتحمل
والرحلة آخرها هتوصله
برضاك أو مغصوب هتكمل
والعمر بيهرب يوم ورا يوم
بتعشم مين وانت اناني
طمعان في الحزن
وعايش فيه
وان مرة سألتك من تاني
لا بتعرف جاي ازاي
أو ليه
بتفكر ليه
والدمع معاك ما بيعرف صوم
وفي عينك نظرة بميت معنى
معرفش أن كان ده عتاب أو لوم
إياك تاني مرة تعشم ناس
انك هتكون كطريق مرسوم
أحسن في نهايته تغيب عنهم
ما هو موش بايديك يا حبيبي تدوم
التعليقات مغلقة.