لو متأكد أنك جاي … وحيد علي الجمال
(لو متأكد أنك جاي)
لو حبيت ترجع انا صاحي
و مستنيك
بابي انا سايبه لسه موارب
هيعديك
لو متأكد انك جاي
هنزل اقابلك وسط الشارع
وهصالح بكره مع امبارح
وهغنيلك غنوة تسهر كل الحي
لو متأكد انك جاي
هاتلي كلام حب مهوش عيب
لما تشوفه الناس في قصايدي
ماتحدفشي خجلها في وشي
وترمي ملامها وتفضل تشكي
ان انا اصلا ماتربتشي
اصل الحب دا اصلا عيب
لو متأكد انك جاي
هات لينا شيخ مايخوفناش
بسمته ساكنه تملي في وشه
مايشلهاش
يوصف لنا جنة ربنا
مايخصصهاش
وان الرحمة قُرَيِّبَه لينا
كُتر ذنوبنا ماتحجبهاش
لو متأكد انك جاي
هات لنا قلب مالوش تكشيره
يشبه آيه في وسط كتاب
لما نشوفه كدا وسطينا
بيفرحنا
مش فاتح لكلامك محضر
ولا مستني ملام وعتاب
لو كترت الدنيا همومنا
يسند فينا ويصبرنا
مايحولشي الدنيا هباب
لو متأكد أنك جاي
هات لنا صاحب بس بجد
م اللي انا شوفته مرة زمان
يحفظ سري يخاف على عرضي
ويحبني من قلبه بجد
صاين بينا العيش والملح
لو خيرته مابيني وبينه
يختار روحه تبقي فدايا
ولا دمعه تنزل ع الخد
لو متأكد أنك جاي
وحيد علي الجمال سرس الليان محافظة المنوفية جمهورية مصر العربية
التعليقات مغلقة.