في حب الوطن “حبيبتي يا مصر “…
أشرف يوسف علي
في حب الوطن
( حبيبتي يا مصر )
شعر : أشرف يوسف علي
المنصوره
محافظة الدقهلية
مصر
أقرب موزع
أستاذ/ ” أمام البوابة الحديدية لمستشفي چيهان بالمنصورة
حبيبتي يا مصر من قلبي
راح اكتِبْلِك و اغَنِّيلِك
و اشيل حُبِّك في قلبي
وادوب
و يسقيني حنان نِيْلِك
و فوق صدرك ينام خَدِّي
و تخديني في أحضانك
و إيدك فوقي بِتْطَبْطَب
وِيِغْرَق قلبي فى حَنَانِك
قالولي اكتب واقول عَنِّك
وانا اللي بَدُوبْ أوي بشوقي
وِنِسْيُوا اني من الْعُشَّاق
وِحُبِّك يجري في عروقي
يا روحي يا عمري يا حياتي
يا غاليه يا حِتَّه م الجنه
بَحِبِّك و اللي داق حُبِّك
قِدِر يرتاح و يتهني
يا أقرب لِيَّا من قلبي
و أغلي عَلَيَّا من ناسي
علي تُرَابِك أنا ماشي
و رافع من زمان راسي
يا نقطة ضَعْفْ جِوَّايَا
برغم الْقوه و الشِّدَّة
بيشرب قلبي من نِيلِك
و قبل صَلَاتُه يِتْوَضَّي
و احس الغربه من غِيْرِك
وادوب يا حبيبتي م الْوِحْدَة
و لو لحظه أغيب عنك
لا يرتاح قلبي ولا يِهْدَي
حبيبتي يا مصر دقاتك
تدوب مع نبض دقاتي
يا شرياني اللي من غيره
أموت ولا احس بحياتي
مشاعري يا روحي مَحْسُوسَه
و دايبه معاگي في الرِّقَّة
و لو مَرَّة أمرتيني
أموت ولا اقولش يوم لأه
و اقول ازَّايْ و انا عمري
بِيِگمل في الحياه بيگي
وگل بيباني بَفَتْحْهَا
لِشُوقِك قبل شبابيگي
يا أجمل حب في الدنيا
أنام دايما عليه و اصحي
خلاص قلبي شِرِب حُبِّك
وِحَس معاگي بالفرحه
الجمعه بتاريخ ٢٠٢٢/١/٧م
بقلم الشاعر : أشرف يوسف
من ديوان : وطني حبيبي
التعليقات مغلقة.