لو معايا بقلم حسن أبوعرب

لو معايا ؟!
كنت جبت الشمس
ف اديكُم هديه
كنت هاقطف م النجوم
اللى ف سمانا فوق صدوركم
عُقد زينه
والنجوم بَرضَك شويه
واشتِريلكُوا جبال تهامه
لو دهب!!
وابنى ليكوا
قصور ماسيه
كنت اغُوص فى بحارها تِمَّن
كل لؤلؤ فيها اجيبه
والكنوز المتداريه
لو بإيدى !!
كنت اخلى الدنيا جنه
والسعاده فيها فرضا
ليس سُنه ؟!
والحمام ابنيلُه غِيَّه
لو بإيدى!!
كنت أبدل الأشواك ورود
كنت ازِيل
كل الفواصل اللى بينا والحدود
كنت اسلسل الظلم
اللى مادد بالقيود
لجل عدل الله يسود
حتى وإن جتنى المنيه !!
بس انا على أََد حالى ؟!
مش مِن اصحاب المعالى!!
مش من الناس الغنيه
اللى راضعه للقساوه
والطباع دا يما غبيه
قلبى فدادين م المحبه
قلبى مبيعرفش حِده
والدليل دمعات عنيَّه….