بتوحشني…شعر جيهان النجار
بتوحشني.
وانا معرفش
ايه حاشني
عن الحلم اللي فات ماجيتوش
مكانش ورايا غير صورتك
مابتبطلشي
أصلا رغي
واللي تقوله بتعيده
وترجع تاخده
من ايده
لأول حرف
والآخر منفتكروش
نقول تاني ….
حبيبتي هعمل ايه يعني
دي ماليه عليا أحزاني
وبتسليني ف بعادك
ماليش غيرها
ونيس تاني
وطول الليل
نجيب سيرتك
فرشنا الشوق
على حصيرتك
لحد الوقت
ماسرقنا…… ومالحقتوش
حبيبي يا آخر
الأهل اللي راحو ماجوش
بتوحشني.
ومش قادرة على الصبر اللي لازق
لي ومابحبوش
ياريت تبعت لي من ريحتك شوية
نور
انا مابشوفش
من غيرك
ويخبطني الوجع
ف القلب
ويكعبلني ف بعادك قلق وشعور
ياريت بالمرة ياحبيبي
توصلني الي عيونك
حنانك هو آخر سور
وقرب سكة الفرحة وحاول تجبرالأمل اللي كان مكسور
ياريت تبعت لي
حلم جديد
انا قدامي لسه طابور
ياريت قلبك يكون واسطة
تقربني من الضحكة
عشان واقفة فى
آخر دور
بتوحشني.
انا بعدك ماليش أحلام
ومش عارفه مكان القلب
مش لاقيه لنفسي كلام
انا امبارح مشيت نايمة
سيبت العمر ف سريري
وعديت لك حدود الفكر من غيري
ولما قابلتني
نسيتني
ماخدتش بالي من روحي
ولا قولتش لنفسي سلام.
بتوحشني.
التعليقات مغلقة.