الحرف الخائف بـ قلم / محمد سعفان
الحرف الخايف
مش قادر ينزل ع السطر
ولاقادر حتي يقوم
الحرف الخايف متعبي هموم
وبيحلم يسكن كلمة تنور بكره
ويعيش مستور
الحرف الخايف
لونزل الدنيا يتوه
ماهو مش معتوه
لكن حساس
والناس
بتشخبط ف الصورة
وتدوس ع الاحساس
وتغير شكل الحلم
لو حب يقوم
ماهو م المعلوم
ان ساعات الدنيا بتمشي شمال
يتقلب الحال
والعاقل يبقي عبيط
ونسمي الترع محيط
بس الطنتيط
عمر ه مابيوصل
ولا بيحصل
خير
ولا شايف
الحرف الخايف
عمره مايظلم حد
والجد دائما عنوانه
ومكانه
ف كلام الخير
بس السطر مش قابل اي نصيحة
خدها صريحة
واركن علي جمب
والذنب
كلنا شايلينه
الحرف الخايف
دايما خايف من ربه
وربنا هيعينه
التعليقات مغلقة.