صرخه شعر / مسعد البحراوي
سجل ياتاريخ وثق عندك
إن انا إنسان ملقتش مكان
لا ف أرضك ولا حتى ف بحرك
وميلادي دا كان من غير عنوان
بتهان وانا أكرم خلق الله
مين بعد ماصوتي ياعالم تاه؟!
زعق في جحود ضمايركوا بلا ؟!
من برد الدنيا وغطاني ؟!
انا مش زعلان ابداً منكم
مبقاش في فؤادي مكان لِـزَعل
دا تاريخ وهيحكي ف يوم عنكم
إن انتوا رجعتوا لعصر هُبل
طغيان وطوفان كفر وعصيان
وانا واقف بعزف ألحاني
على إيد كُتاب
عواجيز وشباب
بتعزي حروفهم أوطاني
قاصد ياتاريخ تكتبني تاريخ
مع اعظم من ليهم تواريخ
من يومي الصبر يقول لي ياشيخ
ومَواطن عايشه ف وجداني
أنا كنت الأرض
وكنت العرض
أنا كنت السنه وكنت الفرض
أنا كنت العهد الرباني
أنا مش محتاج دمع عيونكم
ولاناقص حزن ياشعب حزين
أنا محتاج يرجع تاني دينكم
تتعدل بيه كل الموازين
منكم لله
وحياة
غليان جوه عروقي
وغطايا الساقط من فوقي
بالثلج اللي مولي شروقي
هتعيشوا ف غم
مين فينا أهم ؟!
عريان بلا مأوى وزاده بكاه
أم ناقص دين زاده الطبله
إنسان بقى عايش زي الشاه
صياد يتسلى عليه بنبله
خليتوا القلب بينبض آه
بتمتع رقصتة ناس هابله
والعرض أهو دايما مجاني
عالم جاني
والمجني عليه بس المسكين
تحتوي قصته بعض ثواني
مكتوبه ببوز سن السكين
وبحبر مجمد شرياني
ركنت ببرود فوق الدواوين
لغرتمات لجمها لساني
التعليقات مغلقة.