كل الحروف مشتاقة لك شعر / جيهان النجار
طب انسى ازاى
طيبة قلبك
واعصارك
واصرارك
ونرفزتك
ف وقت الضيق
طريق الشعر
مش رحلة
دا بحر غريق
وأنا ماعرفش فن العوم ف غيابك
أنا واقفة
بدق الشعر
على بابك
انا مشتاقة
لزعيقك ولعتابك
يا معلمني الشعر ووزنه
أرجع يلا وطيب حزنه
كل حروف الشعر بتبكي
اللي حفظته واللي عرفته
واللي فى فكري مكتبتوش
مستنية تقولي
يا بلية ناقص
كلمة وبعض رتوش
أصل الشعر
دا معنى وصورة
كلمة جوة الروح محفورة
اوعي يا بلية تقلدي
حد أو تكتبي وانت مجبورة
خلي الحرف يجيلك
طوع واكتبي نفسك
خلي قصايد الشعر تنفسك
خلي لفكرك
دايما دور
وواعي يابلية تقفي
فى دور
ووعي الحرف يكون مغرور علشان
تفضلي دايما عالية
بت يابلية
شاطرة يابلية
خليكي كده عزيزة وغالية
واكتبي شعر الغيط
والحارة
اكتبي روحها بكل حرارة خلي
حروفك نار واشارة
تحرق كل عنيد مغرور
او متكبر
فاكر ان الشعر
دا حِرفه
ورص سطور
يا معلمني
الشعروحَرفه
ارجع يلا
ورد له شرفه.
التعليقات مغلقة.