واخد قرارك بالرحيل…وحيد علي الجمال
(واخد قرارك بالرحيل)
المواسم كلها متصوره
جنب الخريف
والموج إذا لمس السما
أصبح مخيف
الفرق بين الشبع والجوع
لقمة رغيف
فاضلي يوم في السفر
واصبح رديف
ماتصوتيش
إن دمي فار على جتتي
وجيتلك نضيف
ابقي احكي عني للعيال
عرفيهم إن دمي كان خفيف
متقلبيش النعش تاني
متصحنيش جوه الشتا
ماترَجَعيش زمن الكابوس
علِّي الفانوس شِد الغطا
دا يبقي خوف بدموع كتيرة مزيفة
مش حلم مولود في الدفا هتحققه
ضرب الودع في الرمل مش هيرجعك
يوسف مجبهوش القميص
والحلم يعقوب فسره
طرح الشجر من غير غصون
من غير جذور
يبقى زرع في أرض بور
ممنوع تثور اوعاك تدور
اوعاك تلف في دايرتك
وشك بيرسم في الخجل
يجي ألف لون
بكره مش راح يمنعك
وانت بتعد السطور
الكسر مش نٌص الكلام اللي اتنسى
الكسر سور
شوفت حضنك في المنام
اللي انت عشتُه بعدها
ميخصنيش يطلع دموع
يطلع وجع ماتحكليش
طول عمر صورتك
في الرواية مدهشة وسط الأفيش
حقيقي كانت معجزة
رغم موتك في الرواية
اللي بقت من غير تاريخ
البرد ليل مالهوش عزيز
مكتوب عليك انك تعيش
الحب جوه الجرح عمره ما كان جميل
(الصبر اصبح هد حيل)
افتح بيبان المحكمة
قدم دليل إن أنت وقت المهزله
واخد قرارك بالرحيل
وحيد علي الجمال سرس الليان محافظة المنوفية جمهورية مصر العربية
التعليقات مغلقة.