الحزن المزروع جوايا) بقلم/ الاستاذ الشاعر مدحت رياض
لو قالوا الحزن في يوم بيروح
ده كلام من قلب مداقش جروح
ولا جرب طعم الدمع في يوم
وازاي وانا حي تموت الروح
الحزن لا يمكن يصبح ضيف
ده بيملك غصبا مفاتيحك
ويبات يحسبها بطول الليل
ازاي هيجدد تجريحك
وازاي لو هفوة تعدي عليك
او يوم فكرت ان انت نسيت
بيلم دموعك جوة عينيك
ويغير كل حيطان البيت
ويحط صخور وسط السكة
وبذكرى بيقتلك ضحكة
وتحسه كدين وانحط عليك
ورصيدك م الأفراح صفرين
الصفر الأول م الفرقة
والتاني اتكون م الحرقة
علي ناس سبقتنا على الجنة
من يومها النوم
بقى محض هروب
لمكان بنريح فيه سِنة
او خوف م الصبر الباقي
يادوب
بقى دعوة لربي انه يعيننا
والحلم بقى الشئ الواقع
اللي اقدر اعيش جواه مرتاح
بتنفس فرحة ياريتها تدوم
وبحس بأن الكون ده براح
بس اللي انا واثق منه اكيد
ان الأحزان مبتخلصشي
والاسهل انها يوم ما تزيد
هسبقكم م الدنيا وهمشي
هسبقكم م الدنيا وهمشي
التعليقات مغلقة.