ليه يا بنتى…بقلم هناسعد
ليه يا بنتى؟؟؟
دا انتى ياسمينة فى جنينتى
انتى حب وحضن دافى
نجمة نوارة لسفينتى
غصنك أخضر لسه طالع
بكرة عُودُه يبقى فارع
كنت بحلم أشوفه طارح
يملا بوروده المطارح
وف نداكى أشوف سَكِينتى
من يومين قلبك سألنى
عاوزه إيه يانور عنيا
اهديهولك من عنيا
من بداية شهر مارس
نفسى اجيبلك قلب حارس
رد قلبى قبل منى
انتى ياحياتى الهدية
أغلى عندى من كنوز
الدنيا ديا
انتى عمرى
انتى يابنتى حبيبتى
كنت جايبة عقد نور
وكام فانوس زينة لاوضتك
كنت جايبة لك طماطم
وعم شكشك
وكام عروسة تنام ف حضنك
كنتى بتقولى مش بخاف
فى الليالى الحلوة ديا
ليه مشيتى يا قلب ماما
وسيبتى عرشك
ايه حصلك ؟!!!
إيه اللى خلاكى ضعفتى
كنتى ضحكة عمرى كله
ليكى أفضفض لما بزهق
لما كنت ف يوم أزعق
تجرى عندى تحضنينى
لما بتعب ..
لما بهرب ..
لما أقرر أكون لوحدى ..
بأيدك الناعمة تيجينى
وتسحبينى
وتشيلينى
جوة قلبك
ليه ياعمرى تسيبيني؟!
ليه يا بنتى
ماانتى وعدانى لما أكبر
تكونى سندى
تكونى ضهرى
تكونى أختى او صديقتي
ليه بعدتي ؟!!
ليه يابنتى ؟؟
ليه لما اتوجعتى سكتى
وجوة حزنك اتسجنتى
هى دى هديتك ف عيدى
فى شهر مارس اندفنتى !!!
ليه ياعمرى اختارتى موتك ؟
ضاقت الدنيا البراح
واتخنق جواكى صوتك
اسفة يا قلبى؛ لأول مرة
مفهمتش سكوتك
فانتهيتي
التعليقات مغلقة.