حبيبتي يا أمي كلمات : أشرف يوسف
وف گل يوم بيزيد حنيني
واحب فيكي من جديد
وانا عارف ان فى كل لحظه
تكوني جنبي بتبقي عيد
علمني حبك قد إيه
حب الحياه و الناس سوا
ولو انجرحت ما يبقاليش
يا حبيبتي غير حضنك دوا
و كمان زرعتي محبتك
جوايا و بدرتي الحنين
و وِصِيَّتِك حب الوطن
و انا قولتلك يومها آمين
يا حبيبتي اقول إيه ولا إيه؟!!!
وان قولت ولا يِكْفِي الكلام
المدرسه و الجامعة إنتي
ودراستي في هواكي الْعَلَام
يا حنينه و قلبك سكن
مش ليا بس دا للجميع
و الكل ساعة غربتك
في ثواني مش أكتر يضيع
عنواني مين غيرك هنا
في الدنيا لو عيشت الحياه؟!!!
و هواكي حاسه في مهجتي
وف قلبي وف كل اتجاه
من نور وجودك بهجتي
كان في الْكِبَر أو في الشباب
يا راسمه في حياتي الأمل
من قد إيه علي كل باب
تتمني لو ألمك يدوم
يا حبيبتي بس ما اقولش آه
و تضحي علشان ابتسم
و تدوم سعادتي في الحياه
و الْأَوِّلَه إنتي و بس
والتَّانِيَه إنتي وبس
والتَّالِتَه و لا حد حَبِّك
قدي انا و لا بيكي حس
التعليقات مغلقة.