من غير منحس بقلم حبيبة سلام
مِنْ غير ما نْحِسْ!
والعُمر امّا يْعدِّي أَوَامْ
مِّنْ غير ما تْحِسّ!
وِتْحِسَّكْ مِنْ رُوحَكْ مَسْروقْ
بالَكْ مَشْغول فِكْرَك سارِح
على بالْ ما تْفوقْ
بِتْلاقي الْوَقْتي بَقى امْبارِح
وِيْطُّلّ الُبكْرة المِدّاري فْ
عِبِّ الأيَّامْ
في يْمينُه أمَلْ مَتْحَقَّقْشي
وِفْ جيبُه مْخبِّي الْأَحلامْ
يااااهْ عَ الْأيّااامْ !!
دَانا كُنْت زَمانْ بَحلَمْ ياما
أَيّام اِلْحِلْم مَا كان مَشْروعْ
أحلَمْ بِالْبيت وِالْغيط وِالنَّاسْ
وِسلامِة نِيَّة وْخير مَمْدودْ
وِمَحبَّة وْطيبَة وْإِخْلاصْ
وِبَراح في الْقَلْبِ مالُهْشِ حْدُود
كُنْت احلَمْ بِالجَنَّة وْناسْهَا
وِجَنايِنْ عَدنِ وْحُرَّاسْهَا
بِمَواكِبْ نُور وِمَلايْكَةْ وْحُور
دِلْوَقْتي اِلنُّومْ مَّبّقاشْ مُبْهِجْ
بَقَى شِيءْ مُزْعِجْ سَاكْناه كَوَابيسْ
صَعبَة الْعِيشَةْ وِغَريبَة النَّاسْ
حَتَّى الْإِحسَاسْ بَقَى شِيْء نادِر
سافِر مَع عُمّري اِللِّي مْغادِر
لِأَراضي فْ دُنْيا ما لِيها وْجُود
وِالرُّوح وَيّاهُم مَسْروقَةْ
مِنْ أَوّلْ أَمْسْ
وِبَخافْ لَيْمُرّ اِلْعَمْر أَوامْ..
مِنْ غِير ما نْحِسْ…
التعليقات مغلقة.