ما زالت صَبِيَّه شعر / حسن أبوعرب

ما زالت صَبِيَّه شعر / حسن أبوعرب

كان فى ست وكات غَنِيَّه
كات جميله وكات أَبِيَّه
كان حدَاهَا أرض بِِرحَه
بيوت وشِرحَه
فوق جِبِينهَا الشمس طَلَّه
بأحلى فرحه كات نَدِيَّه
من خيوطها غَازلَه طَرحَه وجلابِيَّه
لسه هِيَاهَا ف صِبَاهَا
لسه مازالت صبيه
صُبح طالِل بيغازلهَا
بين جناحُه يصُب نِيلهَا
من زهور الحُب ينثُر
عِطر أنفاسُه الزكِيَّه
فوق ضفافها الحُب جَنَّه
حُبهَا فرضًا وسُنَّه
مهما تُهنَا ومهمَا هُنَّا
حُبهَا فى الأصل جُنَّه
لو نفُوسنَا تميل شِوَيَّه
ليها ياما ولَاد ويامَا
اللى صَانهَا واللى عَانهَا
واللى دَانهَا واللى خَانهَا
ناس عظيمه وناس غبِيَّه
ياما مَر عليها ياما
مِن ندَالَه ومِن شهَامَه
للضيوف تلقاها لَمَّه
للسلام غُصن وحمَامَه
ع العِدا بتقُوم قيامَه
يبقُوا عِبرَه للبقِيَّه
هى مهد للحضاره
والآثار أكبر أمَارَه
ع الإِمَارَه يا منارَه
وان ربيعِك غاب شويَّه
بكره رَاجَع بالنَضَارَه يابهيه
يامزار الأنبياء والأوليا
أرض ادريس ويَّا موسى
نَبتِ هاجَر وماريَّه
العناكِب مهمَا تِنسِج
م المصايد ١٠٠٠ خَيَّه
مزَعِى خِيُوطهَا بإديكى
انتى لساكِى قَوِيَّه
انفُضِى غُبَار السنين
واطوى ليل الظالمين
كَفكِفِى دمُوع الثكَالَى
دَاوِى كَف المجروحين
امحِى آثارالأسِيَّه
قلبِنَا بيحِب واكرَه
بس عِشقِك لينَا غِيَّه
م أنتِ أصل الإنسانيه
الوطن وانتى الهَوِيَّه
مصر يا أجمل هِديه
انتى لساكِى صبيَّه
انتى لساكِى صبيَّه..