أهي عِيشَةْ بقلم : حبيبة سلام

أهي عِيشَةْ بقلم : حبيبة سلام

دي سِكَّتْنا وْ
بالطول بالعرض هَنِمْشيها
وِدي دُنيتْنا وْ
مَحَدِّش غيرنا يحلِّيها
واهي ماشية الدُّنيا وْمَستورَة
وِالصّورة انْ مالِت نِعدِلْها
على بال ما الْمَوْلى يعدِّلها
وِان يوم ضاقِت هَنقضِّيها بْ
قُرصين طعميَّة فْ نُصّ رغيف
على بصل أخْضر أوْ
عُود جَرجير..
مالْناش في الْكيفْ!!
اِلْكيف لُه ناسُه وْحُرّاسُهْ
وِاحنا غَلابَةْ..
وِالغابة مُخيفة وْ
ناسها نْسور
بِتنَسّر في العَظمِ الحَيّ
وان كان عالدنيا وأحوالها
أهو ماشي الحال وبنتعلم
نمسح بإدينا على قلوبنا
ونخاف نحسبها لنتألم
بنراعي مشاعر وخواطر
وحاجات ياما تسر الخاطر
ونغمي عنينا عشان ما نشوف
مَهْزوزة الصُّورَة بْشَكلِ مُخيف
وِالْخوف ما هَيقدَر يعدِلْها
مَقْلوبة وْحالْها صَبَح مايلْ
وَأدينَا عَليهَا بْنِتْحايلْ
دِي خَطاوي وْلازِم نِمْشيها وْ
بِالطّول وِالعَرض نقَضِّيها
واهي عيشَةْ
لابد نكمِّلها !!