حكايا واحة 57

بقلم :جيجى حافظ

غريبة اقدرنا ….تجمعنا بناس يصبحون هم الشغل الشاغل فى تفكرنا…ونسعى جادين فى حل مشاكلهم …..
اينعم ضغوط الحياة ارهقتنا ولكن هذا لا يعنى ان ندفن انفسنا أحياء …..فالالم قد فاق الاحتمال
قيود صارمة
اسراء بنوتة عمرها حوالى 10 سنين شوفتها فى اول ايام الحجز ليها…كان عندها ورم داخل المعدة وكانت بطنها كبيرة اوووى وشكلها غريب وجميع الاطباء اجتمعوا على عمل عمليه جراحية لاستئصال الورم وبالفعل تم تحديد ميعاد للعملية…اكيد ده خبر في منتهى الصعوبة ..بس الاكيد ان ربنا بيعين وبيقوى …اصعب لحظة انا شوفتها بعنيه ..الام كانت لوحدها وكانت بتبكى بحرقه أن بكره معاد العمليه وهى خايفة. .قولتلها لها طب فين باباها قالت احنا منفصلين وكمان احنا من المنيا وصعب اقوله ….قولتلها لازم تقوليله ويكون موجود مع بنته ….قالتلى هو كان معايا فى الاول وكان مرعوب عليها بس هو لسه راجع امبارح علشان شغله وانا مش عارفة اجيبه تانى ولا اعمل ايه..طبعا قولتلها اتصلى قوليله وربنا يقدر الخير …..حتى جاءت اللحظة القاتله واذ بأحد يطرق الباب ويدخل طقم كامل من الأطباء والصيادلة و الأخصائيين الاجتماعيين ويعطو الام بعض النصائح قبل العمليه ..وانتهى الأمر والكل خرج الا شخص واحد بيده ورقة يطلب من الأم ان توقع عليها…..وتمسك بها الام وتقراها وفجأة تقع على الأرض منهارة من العياط ،،وبتقول مش ممكن ….لأه ….مقدرشى. …حرام …..بنتى لأه ….بنتى لأه … (طبعا علمتم ما بالورقة ……)
هو إقرار ان ممكن يحدث وفاة للطفلة أثناء العملية….
لأنى عرفت انها عمليه خطيرة جدا والأمل فى نجاحها مش كبير….بس لازم من إجراءها…حاول الأخصائي الاجتماعى ان يقنعها ان هذا إجراء روتيني وأن بنتها هتكون بخير ودى مجرد ورقة لإدارة المستشفى وأن الورقة دى بتتعمل لأى شخص عادى بيدخل يعمل عمليه. …طبعا لم تصدقه بس مضت…لا سبيل لها،وخرج الشخص. …وعشت معاها اصعب ليلة فى حياتى…كانت بتتعامل مع بنتها بمنتهى الحنان لدرجة انها ابكتنى من المعاملة وأما نامت البنت وبدأت تتكلم معاها وتقول لها كلام يجعل القلب ينزف دما …كأنها بتودعها…وكل شويها تحضنها وتبوس فيها لدرجة ان البنت بتصحى من النوم …حاولت اشغلها علشان اليوم يعدى بس فشلت كام مره وأخيرا طلبت منها ان نتوسل إلى الله ليكون معها فى أحوج الاوقات…فقامت وبدأت فى الصلاة.وبدأت تعيش فى عالم آخر وكل جوارحها خاضعة تتوسل إلي الله..
وعدت ليلة ثوانيها ساعات ..سكونها ضجيج..سودها أظلم منه ما فى..لكن رحمت ربى اعانتها
وفى هذه الساعات روت لى حكايتها مع الزمن ….وهى كانت حكاية ذو حدين :منها تضيع الوقت والمرور بيه ولكن بتحسى بمرارة الموقف اللى هى فيه اكتر.
المهم الام مطلقة من حوالى 4 سنين ومفيش امل فى الرجوع لطليقها لأنه تزوج وأنجب من امرأه آخرى …الغريب انها هى المسئولة عن بنتها فى كل حاجة من (تعليم وعلاج وكسوه واكل وشرب)والأب بيعذبها أما بيديها جنية فقررت أن تستسلم وتصرف هى على بنتها …وبدأت حياتها تكبل بالاعباء والمصاريف واصبحت تعمل فى احدى الشركات وفى المساء بتفصل ملابس للاقارب والاصدقاء لكى تسد احتياجاتها هى وبنتها وعدت السنين والاب بيشوف بنته مرة او اتنين فى الشهر وخلاص كده ….القضية بقى أن السيدة دى تعبت من الوحدة ومحتاجة سند يقف بجانبها ….باختصار محتاجة تعيش كأمرأة ليها الحق فى الزواج مرة آخرى(خصوصا انها صغيرة فى السن)وعندما تقدم لها راجل مناسب من وجهة نظرها وهى وافقت عليه ..انقلبت الحياة رأسا على عقب..ليه ؟ افتراء من الزوج وأهله يريدون أن يحرموا شرع الله ….ام يريدوا ان يستعبدوا هذة المرأة
تم الرفض تماما من قبل الزوج مع ان محدش طلب رأيه….وتم التهديد من قبل والدته بأنها هيتم حرمانها من بنتها للأبد والقانون فى صفها …
طبعا اتناقشت معاها فى هذه القضية قانونيا فعلا وجدت أن والدتها متوفيه و السيدة محقة..
وهى بتتساءل هو ده يرضى ربنا انى أعيش لوحدى العمر كله او اتحرم من بنتى ليه ..طب ما هو اتجوز وعاش حياته وساب مسئوليتها كلها عليا وأنا وافقت..
ازاى أتخلى عن حته منى …هما ليه بيتحكموا فيا كده.
وأنا أتساءل نفس السؤال …ليه بنحرم ما احله الله؟ ربنا لما نزل آيات الطلاق كان ربى يعلم ان يوجد اطفال….ولم يحرمه على الام ويحلله للاب بل حلل الزواج للطرفين ….يبقى لازم نتفق اولا ان هذا الرأى حرام شرعا
أما بقى النظرة الرجعية المتخلفة للمطلقة لابد من تغيرها فهى إنسانة ضحت بسنين من عمرها فى زواج فاشل وعندما تأخد القرار فى انهاء هذه المهزلة المفروض يحكم عليها بالإعدام.
اه.. يعنى المفروض يتعيش تربى ولادها فى مرار..يا تنفصل وبرضو تعيش تربى ولادها من غير ما تسعد بحياتها مع شريك آخر
يعنى تفضل المطلقة معلقة بين السماء والأرض حتى تحتضر
يا جماعة المطلقة لها الحق فى تغير مسار حياتها مش لازم تدفع عمرها كله تمن غلطة اختيار او نصيب أيها الزوج المطلق..ليه بيجن جنونك عندما تتزوج طليقتك..هل أنت اشتريتها ام هى عبدة ليك ولولادك

اقولك انا ..انت مرتاح ان فى واحدة بتربى ولادك وطبعا مهتمه بيهم لانها أفضل شخص ليهم وشايله عنك مسئوليتهم بالكامل …وطبعا لو اتجوزت هنشغل عن الولاد وده طبعا هيقلقك على ولادك …،صح ؟ منتهى الأنانية ليه مش بتسأل نفسك شوية اسئله
هى شايلة مسئولية اكبر منها لوحدها فأكيد هتتعب
هى أنثى محتاجة للحب والحنان والطبطبة اللى تخليها تقدر تكمل
ليه هنفضل نبص للمطلقة اللى بتربى ولادها انها صنم وماينفعش انها تحس ولا أن قلبها يدق ….
_يا جماعة ربنا اول خليفته سيدنا آدم وحواء …مش آدم لوحده ولا حواء لوحدها…يعنى الحياة رجل وامرأة …العلاقة اللى مابنهم مش المفروض تكون علاقة زيادة النسل .،إطلاقا ….بل جعل بينهم ربى المودة والرحمة والسكن عندما تكتمل هذه الأركان نكون قد وصلنا إلى الحياة الطبيعية التى خلقها الله لنا …يعنى احنا قدمنا حالتين من المطلقات التى تربى أولادها نرفع لهم القبعة: أولا :المطلقة التى تنفصل بعد عناء ومشقه وتحاول ان تربى أبنائها وحدها وفى حالة عدم قدرتها على الاستكمال فى هذا الطريق وحدها وتحتاج لمن يحتويها فتلجأ لشرع الله. ….فأنا شخصيا انحنى لها احتراما لانها أرادت شرع الله ولم تنحرف أخلاقيا (باقامة علاقات غير مشروعة )ونفسيا (انها تصبح إنسانة حقودة كلما رأت ناس حياتهم مستقرة وسعيدة) ثانيا…اللى بتضحى بحياتها والتفرغ تماما لاولادها …فإنها ترى حلاوة الدنيا وسعادتها فى الاستمتاع بكل وقتها بجانب أولادها فادعوا لها الله ان يجعل تضحيتها فى ميزان حسناتها ويزيدها اجرا …. انا مش عاوزة اى مطلقة او أرملة تظلم نفسها اوعى تفتكرى انك لما تيجى على نفسك علشان ترضى الاخرين ان كده ربنا هيكافأك ربنا هيحاسبك على ظلمك لنفسك ….غريزة الامومة ده لها نسبة بتختلف من امراة لاخرى ..بمعنى فى امراة عندها غربزة الاموة تصل ل 100%ولا تحتاج اى بديل …وفى بتكون نسبة الغريزة مثلا 80%وتحتاج لمن يحنو عليها ويحبها. …وفى ناس غريزة الأمومة 10%ممكن تترك ولادها وتسأل عليهم كل فين وفين ..،،بس عارفين حتى دى مش لينا دخل فيها ….النسب دى يا جماعة ربنا وحده هو اللى بيحددها هو مقلب القلوب هو اللى قادر يجعل نسب مشاعرنا تتفاوت من شخص لأخر وبالتالى مش المفروض احنا اللى نحاسب بعض على هذه المشاعر ….(دع الخلق للخالق)
ملحوظة .،هو ليه الزوج لما مطلقته بتتزوج اول حاجة بيعملها ان ياخد ولاده سواء بقى (خطف او عافية او بالود)ده بقى على اساس انك بتنكد عليها عيشتها الجديدة فى اول أيامها ….ام انك بتعذب ولادك فلذات كبدك…
شيل عينك بقى من عليها….. مش حلالك…. مش ملكك.
لازم تبص على مصلحة أولادك اذا كانت امرأة صالحة وتعرف حدود الله فهى أولى الناس باولادها ..وهذا لا يعنى انك تخرج من حياة أولادك ….ابدا انت ممكن تشوفهم كل يوم بالحب والود خد بالك الام هى اللى بتقعد مع الأبناء فى البيت طول اليوم مش الأب هى اللى بتأكل وبتذاكر وبتراعى وبتكبر وبتعلم القيم والمبادئ. …عمر مرات الأب ما هتكون أفضل من الأم إلا من رحم ربى (بس على فكرة فى شواذ عن هذه القاعدة بس ده مش موضعنا)
انا ليه رجاء عند كل زوج طلق زوجته ياريت تجعلها بعد انفصالها مثل أختك وتتعامل معاها بما يرضى الله كما تحب أن تتعامل أختك ….أنت بينك وبينها اجمل رباط فى الدنيا(ولادكم)ياريت تبقى علاقة محترمة وراقيه وتكون لك وتكون لها خير الأصدقاء بدلا من خير الأزواج ….”واتقوا يوما ترجعون فيه الى الله”
خلصت مأساة مامة اسراء مع اشراقة يوم جديد(يوم العملية)وهى خارجة من الأوضة هى و بنتها فى تمام الساعة 8صباحا استودعت بنتها عند ربها وتوكلت عليه وبعد ساعاااااات فى العملية واياااااام فى الرعاية تم خروج اسراء فى أتم صحة وأحسن حال بفضل الله (عارفين افتكرت ايه فى اللحظة دى …افتكرت الركعتين اللى خير من الدنيا وما فيها التى توسلت فيهما لربها …..فاستجاب لها وطمن قلبها )…حمدا لله على سلامتك يا حبيبة مامتك … يارب اجعلنا ممن يحسنون القول ويتبعونه سواء لأنفسنا او لغيرنا
يااارب اتوسل اليك ان تنجى ابنى سيف واسراء وتشفيهم وتعافيهم وتشفى جميع اطفال 57 فأنت احن عليهم منا اتوجه بالشكر لجميع العاملين بمستشفى 57357 ادعو الله ان يجعلكى دايما دارا للشفاء…..
ما أجمل الخشوع اليك ربى !