قلبك امام بقلم الشاعر: أشرف الشناوي
فتحت عينيا
لقيتك جنبى
ولقيتك اكتر
حد بيغفر
ذنبى
لما امشى
باشوف الفرحه
فى عينك
لو مره وقعت
محدش غيرك
يجرى اوام
ويسمى
انا كنت
فى حجرك
بالقى امان
وبراح
لو شايل وجع
العالم كله
ارتاح
زى العصافير
لو طارت
ترجع تانى العش
انا كنت باشوفك
زى الشمس
اما بتدور
والقمره فى وسط
الليل بتنور
انا كنت باشوفك
دايما فى الاحلام
وكأنك قلب
بيفرش كفه
فانام
ليه كل العالم
بعدك عاد
اوهام
انا هفضل ارسم
صورتك دايما
زى ماهيه
طبطبه
حنيه
ماهو ربك خلقك
قلب مافهش
قسيه
ياسلام على وشك
جنه تحس الناس
معانيها
انا يامه باشوفك
دنيا ازاى راح اعيش
بعديها
وهاعدى ازاى
من غيرك يامه
المالح
دا انا عود
من غيرك شايل بس
قوالح
انا يامه باعيش
على ذكرى
امبارح
انا هافضل اجيلك
يامه لحد القبر
واغنى
ماانا عارف قلبك
لسه بشوق
مستنى
وباحس بنبضه
كأنه بينده قلبى
يصلى
انا لسه باشوفك
زى ماكنت تملى
وهيفضل قلبك
ليا امام
وهيفضل قلبى
يطير حواليكى حمام
انا لما باجيلك
بارجع تانى
وكل حروبى سلام
وباجمع تانى
ملامحك وارجع
انام……
التعليقات مغلقة.