المسحراتي…بقلم هنا سعد
مسحراتي
داير يوماتى
يرن طبلة
صحى البيوت
البت عيشة
قايدها فانوسها
خلصت فلوسها
جابت الكنافة
وحبه سودانى
وختامها توت
والواد سماحة
زايد الناصحة
ميل على اخته
خد من فلوسها
جاب الصاروخ
رج البيوت
مسحراتي
داير يوماتى
يرن طبلة
واخته عبله
فرحانه انه
صحى جيرانه
طبلة عفية
وصلت ودان
الواد ياقوت
اصحى يا عمى
ويلا يا خالى
هات ابن اختك
وجايب عيالى
نتلم لمة
تجمعنا لقمة
نعزم جيرانا
ونصفى روحنا
م اللى جارحنا
نقدر نفوت
مسحراتى
داير يوماتى
يقول يا هادى
اهدى نفوسنا
واختم ليلتنا
بنفس راضية
وعفو دايم
ماغيره دايم
والكل صايم
مستنى مدفع
صومه هيشفع
وفى سجده يخشع
بكره هتنفع
من بعد موت
مسحراتي
داير ليلاتي
نسمع غُناه
ونقول وراه
اصحى يا نايم
يا نايم اصحى
وعم نُصحى
اداله شمعة
تنور فنوسه
وزود فلوسه
وجاب كنافة
للبت عيشة
واخته عبله
ونادى معاه
يانايم اصحى
صحى البيوت
التعليقات مغلقة.