قريب الباشا ” ٨ ” فك العمل تأليف : محمد كسبه
واد يا إسمعين إنت جبت الست ميان م الحضانة .
ما إنتي شايفاها قدامك طالعة ع السلم .
باي يا عمو اسمعين
باي يا ميان ،اطلعي لماما
لا هطلع لبابا ممدوح .
إحنا مكملناش كلامنا يا اسمعين
كلامنا في إيه يعني يا وهيبة ؟
فك العمل يا منيل .
بلا عمل بلا نيلة ، أنا دماغي بتوجعني و عايز أقيل شوية .
لا و النبي يا سمعه فك لي العمل الأول ، إنت قولت لي إنك بتفهم في المواضيع دي .
إيوة يا وهيبة أصل إني مخاوي جنية ، و عشان أفك لك العمل فيه شوية طلبات لازم تجيبيهم ؟
و ماله أجيب بس إيه هي الطلبات ؟
نمرة واحد و ده المهم دكر بط أسترالي .
هو فيه بط إسترالي يا اسمعين ، أنا أول مرة أسمع عنه .
إللي خلا فيه عندنا دكر بط سوداني ، ولا هو عمره راح السودان ولا معاه حتي الجنسية السودانية ، يبقى فيه بط أسترالي يا وهيبة .
كلامك صح إنت بتفهم يا سمعه ، بس ده أجيبه منين .
من نيجيريا
ما تيجي معايه نيجريا نجيب البطة من هناك .
بصي يا وهيبة لا تروحي ولا تيجي هاتي ١٥٠ جنية و إني هجيب لك دكر البط الأسترالي من نيجيريا .
ماشي خد ال ١٥٠ جنية و إتصرف إنت ، بس هو فيه طلبات تاني يا سمعه ؟
عايزين نملة يتيمة .
عايزين نملة يتيمة !!!!!!! طب ليه ؟ يتيمة ليه ؟
الأسياد محدش يعارضهم .
طيب طيب و النبي ما تجيبش سيرتهم تاني ، أحسن جتتي ، بتتليش يا وله ، و دي أجيبها منين
من السنغال
و إفرض ما طلعتش يتيمة أعمل إيه ؟
هاتي ٥٠ جنية و أني أجيب لك نملة يتمية.
خد ولا يهمك بس تفك لي العمل .
هاتي ، بس هما ليهم شوية طلبات تاني
زي إيه ؟
مطلوب عنكبوت أعور و ديك مبيعرفش يدن . و بخور مغربي و نص زيتون إيطالي و ربع جبنة رومي ، و بخمسة جنية لانشون و ١٠ أرغفة عيش فينو .
أنا أول مرة أسمع الطلبات دي !!!! زتون و جبنة و رومي و عيش فينو هما مش عايزين مخلل ولا حلاوة طحينية ؟
إنتي هتقاوحي مع الأسياد يا وهيبة .
أقولك خد دي أخر ٥٠ جنية معايه و غور في داهية إنت و الأسياد بتوعك يا اسمعين .
هاتي و إنتي شبه التريلا كده .
هتفك العمل إمتي يا وله ؟
دلوقتي
هتفكه دلوقتي من غير ما تجيب طلبات الأسياد ؟
ملكيش دعوة بالأسياد أني هجيب لهم الطلبات و هعرف أراضيهم .
يعني هتفك العمل من غير بخور !!!! هو ينفع كده؟
و إنتي مالك !!!! هاتي الأتر بتاعك .
تاخد الجلابية إللي إني لابساها .
لأ كده عيب خليكي لابساها .
طب تاخد ال …….
لأ مينفعش
هو إيه إللي مينفعش أنا قصدي تاخد المنديل إللي ف إيدي
الله يخرب بيت قرفك ، بس هو ينفع برضه ، هاتي .
حطي المنديل ع الأرض و حطي فردة الشبب الشمال فوقه .
ماشي أدي المنديل و أدي الشبب فوقه ، أعمل إيه تاني .
خطي عليهم سبع مرات و ف كل مرة تقولي
“يا فكيك ، عملوا إللي عملوه و إحنا بنفكوه و هيتقلب عليهم “
حاضر وسع شوية عشان أعرف أخطي
وهيبة بتخطي السبع خطوات و بتقول في كل مرة المطلوب منها .
اسمعين يشير من بعيد إلي رأس بهية ثم إلى الشبب و المنديل و يتمتم بكلام غير مفهوم و بعد مدة يقول
خلاص يا وهيبة عملك إتفك و هيجيلك عريس معفن قريب إن شاء الله .
معفن معفن و إني لاقيه يا سمعه .
إني هستناك بكرة تيجي تخطبني من أبويا .
يا وهيبة هو مفيش معفن غيري .
إنت أولى من غيرك يا سمعه .
لا يا وهيبة الله الغني عنك يا دبدوبة .
طب غور في داهية من وشي .
كده هتزعلي الأسياد .
الشر بر و بعيد روح مع السلامة و القلب داعيلك يا سمعه .
التعليقات مغلقة.