قريب الباشا ” ٩ ” القطار تأليف : محمد كسبه
القطار يسير في إتجاه عزبة العزايزة
مساعد السواق : يا ريس القطر بيتهز جامد على السكة ، لازم نفرمل و نبلغ المصلحة ، عشان القطر ميتقلبش بينا .
السواق : فال الله و لا فالك
بس دي مش محطة رئيسية ولا فرعية ، كنت عايز أقف في أول محطة تقابلنا .
يا ريس القضبان بتتهز باين كده و الله أعلم حد فك المسامير من القضبان .
خلاص يا إسطا القطر وقف أهوه ، مبسوط يا سيدي .
الركاب ينزلون من القطار بسرعة و يسيرون بسرعة في إتجاة الطريق الزراعي مرورا بسوق العزبة .
في القهوة الموجودة في السوق
إيه إللي بيحصل ده يا ريس هو القطر وقف هنا ليه ، دي عمرها ما حصلت .
هي الناس دي بتجري بسرعة ليه ياد يا حسونة ( صبي القهوجي )
عايزين يلحقوا أي عربية ع السكة يا معلم .
هو القطر هيقعد عندنا يامه معلم شرف .
هو حد عارف حاجة ياد يا حسونة .
يدخل القهوة بائع متجول
السلام عليكم
و عليكم السلام ، هو فيه إيه ؟
ولاد اللذينة فكوا مسامير القضبان و القطر كان هيتقلب بينا .
يا ستار استر يا رب ، هو فيه كده ، يا ولاد الحرام !!!!! عشان حبة مسامير ب ٥٠ جنية يقلبوا قطر !!!!!
لب … تسالي يا لب ، معانه لب سوبر ، حمص ، سوداني محمص ، معانه حلاوة سمسمية .
أحد الزبائن
خد يا بتاع اللب ، هات بحنية لب عباد و بحنية حمص و باكو بسكوت محشي .
و جاي على نفسك كده ليه الكيس ب ٢ جنية
طب هات , قرطاس لب بس
يدخل القهوة بائع متجول .
معانه شربات ، فانلات ، تشيرتات ، من يقول هااااات
يدخل بائع آخر .
معانه ولاعاااات ، إمشاط ، دبابيس طرح ، قصفات .
يدخل ماسح الأحذية
لمعة لمعة إللي عايز يلمع ، لمعة ورنيش .
إيه ده ياد يا حسونة ، هي القهوة لمت كده ليه
أنا إش عرفني يا معلم شرف هو إيه إللي بيحصل؟
خليهم أدينا بتسلى ، ولا يا بتاع الورنيش ، تعالى لمع لي الجزمة يا وله .
على آخر الزمن !!! أنا يتقلي يا وله !!!
أومال عايزني أقولك إيه ؟ أقولك يا باشا !!!!
و الله المفروض بس أعمل إيه ؟ الزمن !!!!
تعالي ياله لمع الجزمة و إنت ساكت
إنت عارف يا معلم إللي قدامك ده ، إللي قدامك ده تاريخ .
هتكون إيه يعني صرماتي ابن صرماتي .
لا و الله يا معلم ، دنا متعلم و ابن ناس ، أنا خريخ كلية تجارة بإمتياز .
و لما إنت ابن ناس كده إيه إللي رماك ع المر ؟
إللي أمر منه يا معلم ؟
هات الجزمة و حط رجلك ع الكرتونة دي .
بيلمع له الجزمة و يقول له
أنا خلصت كلية تجارة و قولت أنزل مصر ، أدور على شغل , كل يوم ألف علي كعوب رجلي و ملقيش شغل ، في مرة قعدت على محطة رمسيس ، لقيت واحد بيلمع جزم ، قعدت أحسب له و أشوف هو بيكسب كام.
أنا مبحبش الأر ع الناس ده .
لقيته بيكسب يجي ٥٠ جنية في الساعة يا معلم .
بس هو مش شغال على طول ، يعني ممكن يشتغل ساعة في اليوم و بقيت اليوم يقعد من غير شغل .
كلامك صح يا معلم ، أنا قولت أعمل زيه ، و أهي شغلانة و السلام لحد ما ربنا يعدلها .
عارف يا معلم أنا كنت من الطلاب الشاطرين في الجامعة و كنت ماسك مسرح الجامعة و كمان كنت قائد فريق الجوالة و كنت أنا إللي بنظم الرحلات .
دنا يامه مثلت مسرحيات في أكبر مسارح جامعات مصر .
يااااااه دي كانت أيام ، الواحد كان ليه قيمة ، دنا كنت بلقي شعر كمان و كل الناس كات بتصقف لي .
يعني إنت مثقف و متعلم ، طب ما تسمعنا حاجة يا أستاذ م الشعر إللي إنت حافظة .
انا هسمعكم رباعية للشاعر : محمد كسبة
اتفضل سمعنا
يا طير
يا طير يا واقع من السما
و الروح تايهة و خلاص مستسلمة
بعد الدلع بيجي الوجع
هي كده أصلها أرزاق متقسمة
الله عليك يا أستاذ ما تقولنا رباعية كمان
حاضر ، أسمع يا معلم
يا طير يلي شايل الهموم
لا فرح بيدوم ولا حزن بيدوم
لو بس تفكر في إللي خلقك
بالصبر حلمك هيتحقق في يوم
الله الله كلام يتاقل بالدهب
إسمه دي كمان
قول يا سيدي
يا طير يلي ع الأرض ماشي
الحياة حلوة بس ما ديماشي
اسعي بس في طريق الخير
كتير قبلك عرفوا إنها ماتسواشي
الله عليك يا أستاذ كلامك جميل و كله حكم و مواعظ
القطر بيزمر
خد الجزمة إتلمعت أهيه يا معلم شرف .
خد خمسة جنية حلال عليك .
الزباين في القهوة
يا معلم أنا مش لاقي محفظتي
يا معلم أني محمولي إتسرق
يا معلم أنا فلوسي إتسرقت
الباعة الجائلين و ماسح الأحذية مع بعض
مفيش غير الولد ملقاط ، إللي بيجري هناك ده يا معلم .
الباعة الجائلين و ماسح الأحذية و زبائن القهوة و المعلم ، و الناس في البلد بيجروا ورا الواد ملقاط
حرامي حرامي حرامي حرامي
امسك حرامي امسك حرامي
القطر بيزمر
الواد ملقاط بينط في القطر و الباعة الجائلين و ماسح الأحذية يركبوا القطر بصعوبة
أهالي البلد
وقف يا إسطي وقف يا إسطي ، حرامي ، حرامي
التعليقات مغلقة.