قريب الباشا ” ١٤ ” غريق تأليف : محمد كسبه
على شاطيء النهر المطل على عزبة العزايزة
العب يا ياسين ، شوط الكورة .
خش عليه يا وليد .
المعلق : الحكم يصفر ، فأول ، يأخذ الكورة يضعها على الأرض يتقدم أحمد يمرر الكرة إسلام ، إسلام يحرز هدفا
المعلق : الهدف الأول لفريق برشلونة يحرزه اللاعب إسلام عز ، الله عليك يا حبيب والديك ، الله عليك يا إسلام ، هدف ولا أروع ، هدف ولا أجمل .
لاعبون فريق برشلونة بقيادة إسلام يسجدون سجدة شكر لله .
المعلق : الكرة مع فريق تشيلسي في منطقة السنتر ، حازم يمرر الكرة لطارق ، يدخل عليه أمير ، أمير يشتت الكرة بعيدا ، لكن يا خسارة الكورة نزلت في النيل .
تدور مشاجرة بين الفريقين و لا توجد أي مراكب بالنيل كي تعيد لنا الكرة ، فماذا نحن فاعلون ؟
أحمد : خلاص يا عم المعلق الماتش خلص و الكورة ضاعت .
الاطفال يلقون بالحجارة و العصي بالقرب من الكرة ؛ لكنها تبتعد قليلا .
علي : هو مين فينا إللي بيعرف يعوم يا ولاد .
كل الأطفال أمير و وليد الاتنين عويمة
يلا يا وليد يلا يا أمير إنزلوا هاتولنا الكورة .
وليد : لا أنا مش نازل دي الكورة بعيدة و مش هعرف اجيبها ، أنا بعوم في الترعة لكن البحر واسع و أني خايف مليش دعوة بالموضوع ده .
الأطفال : بس يا خواف يا جبان ،انزل يا أمير هات الكورة
يلا يا ولاد نشجعوا أمير
أمير ، أمير ، أمير و يصفروا و يصقفوا يلا يا بطل
أمير خلع ملابسه و نزل النيل بالشورت .
علي : شايفين يا ولاد أمير عويم يلا نصقفوله .
أمير : الحقوني … الحقوني … أنا بغرق يا ولاد .
وليد : الحقوا أمير بيغرق و بيشاور لنا هناك أهوه عايز حد يلحقه ، يلا بينا نلحقه .
بس نلحقه إزاي !!!! ده محدش فينا بيعرف يعوم ، هنعمل إيه الواد بيقب و يغطس و بيرفع إيده في المية .
يا ولاد أمير مش باين ، باين له غرق .
الأطفال يصرخون غريق …. غريق …. غريق و يجرون في اتجاة منزل أم أمير .
أم أمير تجلس على الباب و تشمس الأرز .
يا أم أمير …. يا أم أمير .. ابنك غرق في البحر يا خالة .
ابني غرق إزاي !!! صحيح الكلام ده يا ولاد !!!
تنتابها حالة ذهول
يا لهووووي …. يا لهوووووي ، ابني أمير غرق الحقوني الحقوني .
تجتمع السيدات حولها و يصرخون يا لهووووي الواد أمير غرق في البحر
الأطفال و الشباب و الكبار و الصغار يجرون في إتجاة النيل .
المعلم شرف : واد يا إسمعين اتصل لن بالباشا اتصل بعزيز باشا ، يبلغ المركز و الإسعاف بسرعة يا اسمعين .
حاضر حاضر أني هتصل بالباشا أهوه .
ألو يا باشا إحنا عندنا ولد غرق في البحر و عايزين نطلع جتته ، يا باشا ممكن تكلم لنا الإنقاذ النهري عايزين غطاسين، يا باشا .
الباشا :وإيه يعني يا غبي ، أنا مالي يا حمار ما اللي يغرق يغرق جتك داهية تاخدك .
يا باشا إنت الكبير و لازم تتصرف الأهالي هنا متجمعين ع البحر و لازم تيجي بنفسك .
أيوه يا سوسو جاي أهو يا حبيبتي .
سويو إيه !!!! أنا اسمعين يا باشه .
سوسو : يا باشا يا بشبوشي إنت فين تعالى بقى .
اسمعين : خلاص يا باشا أني فهمت ربنا يقويك ع إللي إنت فيه و ينهي المكالمة .
بصوا يا رجالة متقلقوش خالص عزيز باشه في السكة جاي حالا و هيتصل بالكبار و هيخلص كل حاجة بنفسه أومال إيه ده الباشا بتاعنا و كبير العزبة .
عم عثمان : غطاسين إيه احنا لسه هنستنى ، إحنا نجيب المراكبية بتوعنا يدوروا في البحر بالشبك و الهلب .
عم حسان : أنا هتصل ب حسام بيه عضو مجلس الشعب بتاع دايرتنا .
ألو يا حسام بيه ، صباحك جميل يا باشه .
صباحك جميل يا عم حسان أوامرك .
أخبار معاليك .
تمام الحمد لله في إيه يا عم حسان .
عندنا ولد غرق في البحر .
طب خلاص سيب لي الموضوع ده ,أنا هتصل بالمركز و الإسعاف و بالانقاذ النهري و هاجي بنفسي أخلص الإجراءات ، نص ساعة و أكون عندكوا .
تشكر يا باشه .
النسوان بيصوتوا ع البحر و المراكبية بالشبك في البحر بيحاولوا يطلعوا الجثة .
عم حسان : يا أهل البلد حسام باشه هيجيب الإنقاذ النهري و الغطاسين و يدوب نص ساعة و يطلعوا الجثة .
جثة !!!! آه يا ولدي … آه يا ولدي … يا حرقة قلبي عليك يا أمير …. إنت فين يا أمير … يا رب خفف في قضاك… بقى الولد اليتيم إللي حيلتي .. إللي عايشة أربيه يموت غرقان ، و السنة إللي فاتت أبوه جوزي مات في الغربة و أمير كان نفسه يشوفه أهو راح له .
حرام عليكي يا ست ده كله مقدر و مكتوب .
إشمعنا أنا ياختي دنا محلتيش غيره .. آه يا قلبي يا حبيبي يا ابني ، يا ترى إنت فين يا أمير .. يارب تكون عايش … يا لهووووي .
الإسعاف وصلت و عربية المركز وصلت من الناحية التانية
المأمور : السلام عليكم ، قلبي عندك يا حاجة .
أم أمير تبكي..
هو إيه إللي حصل ؟
يا سعت الباشه العيال كانوا بيلعبوا و الكورة وقعت في البحر ، أمير نزل بجيبها غرق .
لا يا باشا دحنا في موسم الغلة و الجنية كل سنة في الايام دي بتخطف عيل .
بطل تخاريف يا راجل و اتكلم عدل .
يا باشا
أيوة يا ست الكل .
أني هحكيلك إللي حصل بالظبط .
اتفضلي يا حجة .
إللي حصل إن الكورة وقعت في البحر .
كويس تمام ده احنا عرفناه ،عندك جديد ولا لأ .
العيال يابني حدفوا الطوب في البحر عشان يجيبوا الكورة .
طب و ده معناه إيه ؟ عادي يعني !!!
لا مش عادي يابني .
ليه ؟
الطوب ده كان بينزل على رأس الجنية إللي كانت نايمة في قعر البحر ، فلما العيال حدفوا الطوب هي زعلت و حلفت لتاخد واحد منهم و أهه ده إللي حصل يا بني .
يعني إنتي عايزاني أكتب في محضر رسمي إن ال غرق الولد الجنية ؟ روحي يا حجة شكرا .
خلاص يا باشا عربية الإنقاذ النهري وصلت و الغطاسين نزلوا يدورا في البحر .
آه يا ولدي ..
قبل آذان المغرب بساعة اللانش النهري يتجة للبر التاني علي بعد ٢٥٠ متر تقريبا .
أحد الغطاسين يناول زميله جثة الطفل و يتجهون ناحية الأهالي .
أشوف ابني أركب معاه عربية الإسعاف .
حسام باشا : ركبوا الست مع ابنها في الإسعاف .
في المشرحة
حسام باشا يتصل بالمأمور
مساء الخير يا باشا أخبار معاليك
الحمد لله أنا خلصت الإجراءات في المستشفي و الدكتور كتب في التقرير أنه لا توجد أي شبهة جنائية و إن سبب الوفاة اسفكييا الغرق ( امتلاء الرئة بالماء ) .
و احنا جايين في السكة بالعربية عشان الدفن .
أيوة يا حسام باشا إحنا عايزين العيال إللي كانوا بيلعبوا معاه عشان نستجوبوهم و نقفلوا المحضر .
حااااضر …. أنا بنفسي هجيب العيال بطريقتي عشان الأهالي متتخضش .
تمام يا حسام باشا مع السلامة .
في العزبة على المقابر
عم حسان : حسام باشا خلص الإجراءات و الجثة جاية في السكة .
اسمعين : هو النور في العزبة مقطوع ليه
حسونة القهوجي : بيقولوا فيه عربية نص نقل دخلت في كشك الكهربا إللي ع السكة ، طب و هنعمل إيه .
الأهالي على الطريق يشعلون النار في النبابيت ، سيارة الإسعاف تصل في منتصف الليل .
الأهالي يصلون على الطفل في المسجد و يتجهون إلى المقابر لإتمام مراسم التأبين وسط صرخات و بكاء النساء .
اسمعين : منك لله يا أم السعد
البلد هتصبح في ميه و تموت في نار .
عم حسان : هو عزيز باشا مجاش ليه يا اسمعين .
عزيز باشا تعبان و هو خلص لنا كل حاجة بالتليفون .
هو إللي خلص كل حاجة !!!!!!!
التعليقات مغلقة.