الوداع ياغالى بقلم مصباح أبو حماد

في توديع شهر رمضان المبارك

جايّ زيارة . ضيف وجميل
بيعدّى علينا ومستعجل
زى نسيم الصيف وعليل
بيهلّ علينا ….ولا يْطوّل

عدّى معاك التلاتين يوم
قول كام ساعة.لأ. مايكمّل
إصحى ياقلب وفوق م النوم
يوم العمر لغيره يِوصٌل
…………..
تيجي تملّى معاك خيرات
بالبركات…دايما متحمّل
باعت ربى معاك نفحات
وليلة القدر دي فيك الأجمل

صحّ القلب معاك اتهنّى
مع إنك فينا مابِتْطَّول
إحنا معاك حسِّينا الجنة
وملايكة رحمان تتنزِّل

وبشر تلقى ف طبع ملايكة
لماالاحساس ليها بيوصل
وإيدين ف الخير هنا متشابكة
عارفة طريق الخير.هاتكمٌل

والأخلاق.ما احلاها أخلاق
وبأجملها صفات تتجمِّل
خالية الكدب.وخالية نفاق
ولا بتفلسف……ولا بِتْأوٌِل

القلب كان ع القلب رحيم
وعن أوجاعه..مابيتحوّل
بيحسٌ بمسكين ويّا يتيم
الأيام دى…اكتر م الأوِّل
……………….
في كل عام ..بتيجينا زيارته
بس اشواقنا .. ..ماتتحمّل
من غلاوته .. وكتر حلاوته
بنحسّ إنِّ غيابه .. يطوّٓل

إوعى يضيع منك رمضان
إغنم فيه .. الكنز الأجمل
راح تلقاه ف حساب وميزان
أصل الصوم ف الكفَّة يتقَّل

رمضان فينا يا أجمل ضيف
خَلَّى القلب احسن م الأول
يارب يظلّ القلب نضيف
وف غير رمضان ولايِتْحوِّل

يبقى وصلنا صحيح للتقوى
هيَّ دي هدف الصوم الأول
وأكيد ربي علينا هايرضى
ويغفر لينا الزمن الأول