مش صورتك دي ؟! ” أغنية جديدة ” كلمات الشاعر أشرف يوسف
مش صورتك دي وانت معاها ؟!!
وانت بتتكلم وياها؟!!
ولا نزلت عينك عن عينها
و انا زي ما شيفاك شيفاها
لو اكدب عيني لكن أبدا
مش ممكن اكدب إحساسي
ولا قلبي اللي وهبته لحبك
وافتكرك ولا قال يوم ناسي
لسه حا تتكلم بعد ما شوفت
اللي انا شيفاه و تقول تاني؟!!
و تخبي عليا و تخدعني
وتسيبني أعيش مع أحزاني؟!!
روح ٠ قلبي خلاص بعدما حبك
ما بقاش يفتكرك و لا ثانيه
إنت اللي جرحتني م الأول
واخترت تعيش مع ناس تانيه
كنت بترسملي حاجات فى الوهم
و عايشه معاك علي نياتي
و اخلصلك و انت بتخدعني
و اتاريك بتضيع أوقاتي
زي ما قولتلي في الحب كلام
بالكدب هناك روح قولهولها
و حكاية الحب اللي حكيتهالي
ياريت وياها تكملها
ما هو نفس الكاس اللي سقيتهولي
في لحظة ضعف حا تسقيها
وكمان زي ما مثلت عليا الحب
هتلعب يوم بيها
وتشوف اللي انا وياك شوفته
وتعيش اللي انا وياك عيشته
و هتندم أكتر ما انا بندم
و تقول اللي عليك انا قولته
وساعتها أكيد هتشوف غيرها
ما هو طبعك عمره ما يتغير
خاين ٠٠٠ و بتغدر ٠٠٠ و بتخدع
و أناني و أمرك بيحير
منك لله أنا مش ظلماك
علشان تظلمني و تنساني
هيجيلك يوم و اللي انا شوفته
هتشوفه و مش هرجع تاني
هتشوفه ومش
هرجع تاني
التعليقات مغلقة.