( جلسة سرية )
بقلمي/مدحت رياض
الحكم مهوش أخر الجلسة
ولا هلبس بالطو وهترافع
لما الأيام تقلب ضدك
لا يفيدك تشكي ولا تدافع
ولا فيه إقرار يثبت إنك
منتاش موجود وقت الواقع
والواقع شد معاه ذكرى
واتحالف مع طيف كان سامع
والصدى جواك قلب صفحات
بتسطر مواويل ومواجع
والجلسة إن كانت علنية
فشهودك في اللستة صوابع
كتبت للناس عن طول همك
والسطر إن مرة نقص كلمة
بتلاقي حروفها بقت دمك
والعزوة مهيش حبة أصحاب
ولا حتى في خالك أو عمك
اتلفت حواليك حتلاقي
أقربهم منك بقى غايب
وإن قلت اتحمل واكمل
إزاي والقلب صبح دايب
الشعر صحيح لساه أسود
إنما جواك اصبح شايب
في ملف الدعوى
مفيش بصمات
غير ليك على دفتر أحزانك
وموقع للناس من صغرك
على صك بيمنح غفرانك
وبيشمل كل اللي سابونا
او حتى اللي في غيبتك
خانك
الدعوى دي شكلًا مرفوضة
وكلامك في الذكرى أهو دانك
خليك مقفول
على صوت حرفك
والآهة إن طلعت علشانك
إبقى اكتب بيت اخر القصة
ان المقصود موش حرمانك
وإياك تاني مرة تفوت عقلك
أو تشكي لحد مهوش سامع
ولا تلبس توب
غير توب نفسك
أو تحلم ابعد م الواقع
وقضية عمرك سلمها
للمولى الخافض والرافع
ولامرة تسلم ليه امرك
الا ويرضيك لو ليه راجع
محكمة الدنيا مهيش فاصلة
وقانون الأيام موش جامع
في بنوده مفيش
إنصاف لضعيف
او دوا للعمر ان كان ضايع
أوصيك بالصبر
ان كنت حكيم
او للايام قلبك بايع
اصبر على جرحك أو همك
والكون حواليك لساه واسع
والصبر ده رزق من الخلاق
وفي يوم الحشر اهو ليك شافع
الصبر ده رزق من الخلاق
وفي يوم الحشر اهو ليك شافع
التعليقات مغلقة.