اثبت حضورك…
وحيد علي الجمال
اثبت حضورك
واستنى دورك
الرول كبير
مين عَرَّفك شكل الغفير؟
جَمّع كلبشات الوطن
واكتبني جوه المحكمة
من غير ضمير
أدمنت صوتك
والعينه طلعت شمال
لأ يمين
العينه قالت وجودك
جوه دمي مستحيل
نادوا الشهود
احلف يمين
انا مش نبي
بس الحقيقه بدون دليل
مين فَهِمَك ان احتلالك
هو الطريق المستقيم
الوحي مش للطيبين
إخلاء سبيل بضمان قصيدتك!
هو انت فاكر شكل صورتك؟!
الليل طويل
والخوف بيخنق في المقام
الخوف بريء
الشنطه مرهونة بقميصك
والديب مهاجر من سنين
كل اللي مكتوب ف الكشوف
ممنوع يكونوا كدابين
طب مين سرقنا..
واحنا بنفرق نصيبك؟
هو انت صايم؟
والا احنا لسه فاطرانين
لازم دليل
طب امتى ترجع
جوه زنزانة حياتك؟
حتى الرجوع بقى مستحيل.
وحيد علي الجمال
سرس الليان محافظة المنوفية جمهورية مصر العربية
التعليقات مغلقة.