خطاوي الزمن بقلم : تهاني بركات
شايف خطاوي البحر
على الرملة بتتكلم و بتعلم
و بانية قصور من الوهم
سبقاني أحلامي و راسمة
من حروفي الصبر
و لما يثور موجي
و يغلبني بتنهيده
ألملم من الخلا روحي
و أسقي الملح لجروحي
سافر بين خطاوي الزمن
سافر من الوجع لوريدي
خليك دايما وجهتي
خليك أماني و سكتي
أصل الأمان مش كلمة
و لا نغمة حلوة في غنوة
الأمان هو الدفا
في ليلة شتا
بين عيون بنحبهم
هو الضحكة على الوشوش
لو حتى عايش بين وحوش
الأمان هو السند
لما تميل تلاقي حد يسندك
و يداوي جرحك و يطببك
تلاقي حد يسمعك
يداري ضعفك
و يمسح دمعك
جوه قلبه يرسمك
الأمان إني أعيش
بين حروف ما تنتهيش
و إن غدر بيا الزمن
أفضل في قلبك
ذكرى حلوة ما تتنسيش
التعليقات مغلقة.