طراطيش فرح شعر اشرف الشناوى
كان نفسى
اكونلك فارس
أحلام
او سوبر مان
او حتى الجن
اللى بيطلع
ويقول
شبيك لبيك
كان نفسى
اكونلك خاتم
سليمان
مش واحد
شايل أحزان
وتشيلى الحمل
معاه
وتعيشى القسوه
المكتوبه
وبحكم الله
كان نفسى
اكونلك فرحه
بجد
مش سكينه
بالفين حد
كان نفسى تعيشى
زى الامرا
السلاطين
حظك جابلك واحد
من وسط
المساكين
بيغربل احزانه
يوماتى
بيدور على ضحكه
تنبت وسط
الطين
كان نفسى اجيبلك
كام عود ياسمين
مش جرح
يدغدغ فى ضلوعك
ويطفى النور
فى عينيكى
الحلوين
كان نفسى اقولك
أنا مين
بس انتى استعجلتى
وخسرتى فى عمرك
احلى سنين
ملعون الحب
اللى بيقتل
فى قلوب عاشقين
كان نفسى اكونلك
فارس
مش حارس
فى عيون مساجين
كان نفسى
اطير فى السما
او اى براح
لكن مقدرتش
مره اكونلك حتى
جناح
سامحينى ان كان
لسه فى قلبك
حته
خلينى ارتاح
يمكن القالك صبح
فى مره
وسط الاشباح
او نلقى المفتاح
فتعيشى الباقى
فى عمرك
طراطيش افراح ………………
شاعر عاميه
البرامون
المنصوره
التعليقات مغلقة.