فى المُبتَدا…

أحمد كريم

فى المُبتَدا
لَمّا عُمرَك إبتَدا
عَلِّموك معنى الكلام
علموك كلمة سلام
سَنِّدوك عشان ماتمشى
وان وقعت
مفيش مَلام
ماانتَ بُكرَه ياما تمشى
وبُكرَه ياما
يكعبلوك جُوَّه الحُفَر
ناس كتيره ولاد حرام
علِّموك الصَّبر لمّا
تِبقَى وحدَك بعد لَمَّه
رغم خنقة الزحام
حَفَّظوك كل الوصايا
حَذَّروك كل البَغايا
رَضَّعوك ازاى هاتمشى
جنب حيطَه لَجل تبقَى
وَيّا نفسَك فى انسجام
فَهِّموك تِرضِى ضميرَك
لَجل ماتعرف تنام
بس نسيوا يعلمونا
لمَّا نيجى نبيع ضميرنا
الضمير ده يسوَى كام