شاعرة
شعر/ عبير عبدالمنعم
يا شاعر وعايش
تعاند تعافر
وتحلم بأنك…. تفسر رؤاك
بترسم وشوش
ماليها الرتوش
وفنك وحرفك …..ده هو هواك..
تلضم في ضحكك
ترتب في حزنك
تعاتب هروبك ….وتمسح بكاك..
يا شاعر وياللي
كلامك حكم
ومره تكون… دموعك ندم
كتير حرف ودك
كتير بس أدك…. ما حد اتظلم..
قلمك بيكتب…
مشاعرك صحيح
وحرفك بيعلى
بصوته الجريح….
يا شاعر حروفك…. شبهها النجوم
نشوفها بتبرق…. في وسط الغيوم..
بتسأل سطورك وروحك سؤال
بترسم فطورك …..وجوعك محال
غداك مستخبي….
في جبة عشاك..
يا شاعر ووطنك …..بيحلب محن
يهون بس لما ….. بنلقى السكن
بيوصف في قهوة……وشاي الحسين
بيكتم في صوت….
الهموم والخرس
ياشاعر وضحكك ماليك بالامل
قلمك لجامك …..
وورقك فرس
بيقول واهي ازمه تعدي وخلاص
هنطلع منها بفسحة …..
وجرس
يا شاعر..معدي…..
مهدي الكلام
بتسمع حبايب في ليلك ملام
بترسم بنبضك….. نبض وعلام
تلجم في ريحها وانت الأمام
تكون بس مرجع ….لكل المدار
سطورك دي قمره في ليل الحصار
وشعرك ده شمس …ولازمله نهار
التعليقات مغلقة.