انا قلبي طلع كداب … وحيد علي الجمال
(انا قلبي طلع كداب )
ولما المحنة ضمتني
وعصرتني و وَضَّتني
من الزيف اللي كان
طابق على صدري
ورامي احمال
جبال قسوة على كتافي
شكرت ظروفي والشدة
وخنقِة روحي والجِتَه
على الظلم اللي فيه حِدَّه
وكان فاضل كذا حِتّه
وتِكْمَل عندي كِدبِتْهَا
واعيش مخدوع بقِصتها
خلاص شوفتك بلا ألوان
وكان عذرك ضعيف بهتان
مالوش عنوان
وكان عنواني عنوانك
وعشت كتير على سيرتك
وساكن فيكِ بتعبد كما الكُهان
أنا المدبوح في محرابك
وكاتب اسمي على بابك
برغم دموعي في غيابك
راح اتْمَسَّح بأعتابك
انا البركات وانا الحسنات
وانا الديب اللي متعلق
على ديله سبع لفات
ومشروطه على جبينه سبع طلبات
عملت حجاب على حجابك
وجبت التوبة في حسابك
وكان قلبي في عز الجرح
بيسامحك ويغفرلك
أنا قلبي أكيد كَدّاب
راهنتك إننا نرجع
ويبقي حُبِنا مَرْجِع
ونني عينيك كان يلمع
ويعملي كدا حركات
وبعت في حُبك الصالح مع الطالح
بلا فاتحه ولا ضمه
وحرف الجر جرجرني
كما المقتول على الطرقات
صَبَح قلبي بلا مأوىٰ
يخاف يظلم ويستقوىٰ
فعاش درويش على جراحك وأحزانك
وكان في العشق بيّكَفَّر
ذنوب دابت في أوجاعك
كتبت ديوان بيتغزل
وكنت أغزل
قصايد شاهده ع الحب اللي كان
بيصلي في جبينك.. طِلِع كداب
انا رافض تسامحني
على هروبي من الأوهام
وحقي فيك مش عاوزُه
ورافض حتى أي عتاب
ولو كان الثمن قلبي
أنا كِرِهْتُه على كدبُه
أنا قلبي طِلِع كداب
وحيد علي الجمال
سرس الليان محافظة المنوفية جمهورية مصر العربية
التعليقات مغلقة.