أروح علي فين بقلم حمادة ريحان

أروح علي فين بقلم حمادة ريحان

أسيبك .. بس اروح علي فين
وأنا معرفش غيرك حد
مهو انتي السبت وانتي الحد
وانتي الراحة في الشدة
وروحي فداكي وقت الجد

أنا اللي حلمت فيكي بغيط
وأسرة وبيت
ولقمة عيش نغمسها
بجبنة وزيت
واشوف الدنيا فيكي براح
وانام والبال خالي ومرتاح
وياما حلمت واتمنيت
يكون لي نصيب
وسهمي يصيب
وأدخل سحب ع اليانصيب
أتاري الحظ مش ليا
دا متفصل علي المحاسيب

بكيت ف الليل كتير جدا
وديك الفجر قام يدن
أدانه يصحي النايمين
ونور الفجر بيشقشق
احس بآااااه بتتعشق
في طرف لساني توجعني
ومين دلوقتي يسمعني
اقوم امشي ؟
طب امشي بس اروح علي فين ؟

ومهما مشيت ….
بلاد الله لخلق الله
ألاقي الآه تجر الآه
فبضحك ضحكة موجوعة
وأرفع شكوتي لله
واقول الآااااااااه 200 مرة
أحس وجعها في ضلوعي
وانادي بلادي ياحرة
قنالك شقته دموعي
وعرقي بيجري مع نيلك
انا اللي ف قلبي بانيلك
قصور العشق من مرمر
وأنا اللي في كل ميادينك
هتفت بحبك الأكبر
فليه دلوقتي تتخلي
وبتهيني ،،،،،، وبتذلي

خلاص الدمع اتحجر
وهيجف بجفاف نيلك
تحابي في اللي سارقينك
تذلي في اللي شاريينك
مادمتي يابلدي مش قادرة
تعدلي كف موازينك
هسيبك بس مش عارف ..
أروح علي فين ؟؟؟؟؟؟؟