بمناسبة يوم الأب .. “أبـويـا “…
معوض حلمى
بمناسبة يوم الأب
ــــــــــــــــــــــ أبـويـا ــــــــــــــــــــــــ
أبويا اللي كان فـلاح للـشر كـان مـانـع
كان رزقـه ع الفـتاح كان مدرسه وجامع
سابلي الكرامه سلاح والفاس ميراث عدله
والأرض تـشـهـد لـه لعلومها كان جـامع
أبـويا مــن عفـته شد الجسور مسطره
وراسـه مـن عـزته طالت شـواشي الدره
والعصر في المندره لم الجـيران حواليه
والناشفه كات ف إيديه طريه ومخضـره
أبويا كان طيب قـوي كالنبــع صـافي
كان زي نسمه حنينـه ترمــي العـوافي
كان لما يقعــد وسطنـا يحــلى الكـلام
والمغربيه فحضنه انام كان حضنـه دافي
أبويا قـبل السواقي خضر غـيطانه البور
مالفجر يروي الشراقي بشادوفه والطنبور
يسـرح ينقـي العفـش وف إيده عـوائه
كات أرضـه مشــتاقه وغنـاه يلم طيور
أبويا شق المراوي طهرها م المبسوطه
لشطوطهـا كان غـاوي زرعها كـام توته
بنالــه عـشــه هــنـاك ضـلتـهـا جمعـانا
وجاموسته شبعانه في وتدها مربوطه
أبويا حــش الـربـه بطنين بسن السيف
وراح يخـضـر غــله بدارها غـيه وكيف
ماخافش يوم م الشتا ولاهزه ريح أمشير
والربه عـايزه نشير لاجل الدريس فالصيف
أبويا غـنى غـناه كـات فاســــه اوتـاره
والسكه كات عشـقاه وعـارفه أســـراره
وان راح لغيطه وسرح الـزرع يفرح بيه
والفـول بيسأل علـيه كان شـكل نـواره
كان رزق ابويا يواتي لما الحصـاد بيحين
الـرز جابو قـتاتي والغـله جابها طحـين
دخلت أوضة المعايش فيها الخزين مؤتمن
مليان دولاب اللبن م القوعب قول عشرين
أبويا ساعة عـصاري بعــد الصـلا بالقاه
كان يجي يقعد جاري والقعده تحلى معاه
كان لما يمشي وراه بلاقـي سـرب طيور
كان زي طير مسحور هايم في حب اللـه
ـــــــــــــــــــــــــــــــــــــــــــــــــــــــــــــــ
بقلمي خن ـ أنوب الجديد معوض حلمي
منشأة بطاش / تمـي الأمديد / دقهـليه
التعليقات مغلقة.