الدنيا مدرسة ” قصيدة جديدة” بقلم الشاعر / رضا أبو شنب
الدنيا دي مدرسة
والكل منها جريح
فيها اللي غاوي النسا
وينط علي المراجيح
وتشوفه ناقص خشا
وتحس انه قبيح
بيسيب صلاة العشا
والفجر والتراويح
بيحب نومة الدفا
علشان سريره مريح
وان مرة قام واختشي
يحتاج له كام تصريح
لو مرة شاف خنفسه
بيعدي زي الريح
فيها اللي لما اختشا
ميت وماله ضريح
ميت في حب الوفا
ولسانه منه فصيح
لا عمره له في النسا
ولا حتي في التلقيح
لا مرة حب في رشا
ولا حتي بالتلميح
لو يعزموه علي العشا
من خوفه منها يسيح
فيها اللي للمصلحة
يعمل علشانها دبيح
لو يضربوه علي القفا
بيحس انه مليح
والضرب منهم شفا
وتحس انه صريح
عايش في حالة صفا
ياكل ويشرب شيح
يرقص علي المطرحة
يعمل عجوز وكسيح
لا عمره يوم اكتفي
ولا يملي عينه الريح
مكتوب علي المدرسة
فيها العلام بصحيح
من الصبح حتي المسا
والديك معاها يصيح
في ناس تشوف وشها
افضل من المصابيح
وناس تقرب لها
تقول لربك زيح
وناس تغش امها
وتغش في التسبيح
لو فتحوا يوم قلبها
هيبطلوا التشريح
ويخافوا من حضنها
ويدفنوه في الشيح
الدنيا دي مدرسة
الكل منها جريح
التعليقات مغلقة.