الــــدفـة …
معوض حلمى
ــــــــــــــــــــــ الــــدفـة ــــــــــــــــــــــ
الواد محروس
مافارقش الكوبري النايم على شطين الترعه وسافر
وبقاله سنين وياه وهما ال اتنين اصحاب
الواد محروس
مابدرش الارض تقاوي الغله وبيعافر
علشان في الآخر يحصد لبلاب
كل اللي بيقلع في زمانا مهاب
كل اللي بيوهب عرقه ويزرع منحوس
الزرعه مجابتش فلوس
ولاجابت حتى لباس
ولاجابت حق الدوا لولاد محروس
علشان التاجر كداب
وانا حارس ع الباب
خايف م الآيفون ،
والواي فاي ،
والنت
ومواقع مدسوسه علينا
وبتهدم فينا حصون
خايف من أفلام الجنس
وم البودرة
وم القدوه السوء
والسوق دا غريق
خايف م البلطجه والقدرة
لما تشيل سنجه وتمشي تدبح في المخاليق
وخايف م الواد اللي اسمه حبيشه الواطي الدون
وخايف من اوكا وبيكا وأرتيجا في زمان ملعون
وخايف م البت العريانه اللي بترقص في التليفزيون
وخايف جدا جدا جداً جداً جداً
لابناتي يقارنوا مابينها وبينهم
ويقولوا يابويا
مش قولت علينا إن إحنا بارودك
لو هم شيطان الضلمه وعس
طب ليه بس ، لما احنا ورودك
تحبسنا بخوفك في الدار وتمنع عنا خيوط الشمس
وليه سايبين البت اللي بترقص عريانه بتغوي سنابل زرع بلدنا
علشان يطلعوا فارغيين ، خاليين م الحس
والمنتج في بلدنا بوشين ياإما مريض النفس ، أو تعلب مكار
ماسك بإيديه الدفه وسايق وكأنه الشاطر بحار
مبسوط إن إحنا بنتكفى ف نوة والموج غدار
موت إحساسنا ومن خوفنا غمينا عينينا
والبنت اندبحت في الشارع من فكر العار
ونسينا إن القيم المتهانه ف ناسها ، ناسها صغار
ــــــــــــــــــــــــــــــــــــــــــــــــــــــــــــــــــــــــ
بقلمي خن ـ أنوب الجديد معوض حلمي
منشأة بطاش / تمي الأمديد / دقهلية
التعليقات مغلقة.