وشوش كتبها / عصام أديب أبو شحاته
وشوش في الصوره هربانه
وشوش في الصوره لسه تعيش
سنين دايره مـ دريانه
وأحنا ع الورق طراتيش
نبيع ونشتري فـْ روحنا
ونشرب خل من بوحنا
ونغزل فتل بجروحنا
نلفه ع الريسان طرابيش
فلان ميت فلان عايش
كتير م الخلق يتعايش
مدام خلف الضلوع انفاس
مـَ نزرع م الوداد تعاريش
فيطرح ع الحيطان عنبه
ونفرش تحتها كنبه
يعدي العصر ويمسي
وأحنا ع الوفا بنعيش
وليه نغضب ونتألم
ربيع العمر بيسلم
خريف غادر بيتأمِر
على العايش من المهابيش
التعليقات مغلقة.