موال شجن…بقلم اشرف الشناوى شاعر عاميه البرامون المنصوره
علموا قلبى البكا
شالوا منه الحلم
وسابوله الشقا
دغدغدوا
خضر الامانى
علموه ينسى الاغانى
كتفوه من غير
سلاسل
كتبوه أخطر تنازل
بعتروا فيه الوجع
اجبروه بالحزن يركع
بعد عمره اللى اتخدع
رجعوه الفين سنه
طلعوه سابع سما
نزلوه عالمحكمه
دخلوه عالسجن
فانصاب بالعما
زودوا حبه الحرس
علقوا فى كفه الجرس
علموا قلبى البكا
لما انخرس
قلبى ياموال شجن
كنت يوم ليهم وطن
فرطوا فيك للديابه
قطعوا فيك
وبشياكه
قلعوك توب الحيا
لبسوك توب الغلط
طلعوا كام مستند
يثبتوا فيك العبط
قلبى يافارد قلوعك
قيد لهم شمعة ضلوعك
خبى وشك لا يشفوك
قلبى ياشط الغرام
حرموا ليك الكلام
لجموك
سكتوك
حسسوك
بالعجز بالموت
بالكسل
وفى عز عز
الانتصار
احلى شئ فيك
اتقتل
قلبى يامرمى
النيران
غرقوا فيك
الغيطان
قصقصوا فيك
الامانى
طلعوا فيك
الشيطان
علموك ازاى تغنى
رغم احزان
الزمان ………………
التعليقات مغلقة.