ت
البرد…لمعوض حلمي شاعر عامية
…………. البرد …………..
……………………………….
أربع صور جوا القزاز
ندل / وكلب / خنجر / وقلب
حواليهم البرواز
الندل خان / والكلب صان
والخنجر الصوان
مغروز في قلب العزاز
فعل البشر يدهشك
بقينا كسر قزاز
الفكره النشاز
لو نغششت تدهسك
كل الخطاوي ع السكك
والحكمه بين السطور
والحبر سري
الشجر في وش الريح
لازما يميل
صوت حفيف الورق
فاق الصراخ
والعش .. :
العش فاتح ضلفتين
بينادي ع العصافير
لون الغمام قاتم
ريحة المطر بترعب الشبابيك
والشمس .. :
الشمس عاجزة
مش قادره تبعت خيوط الدفا
وإزاي مشاعرك تنتشي في البرد
والرعشه نايمه في الضمير
وإزاي أسير الخوف
من غير جناح يقدر يطير
والحفلة لسه هاتبتدي
الورد .. :
الورد ع الطاولات مخاصم المعازيم
معادش حد بيداعب الألوان
والضحكة نايمة في الكاسات
والساقي .. :
الساقي داير ع المدار
بالصبر والسلوان
الإهتمام .. :
الإهتمام شلال
بيبعت الإحساس سيول
بس القلوب عتت
الأوردة قفلت بيبانها
والنبض عايز مدد
والعيون .. :
العيون تايهه بتدور ع الشطوط
نفسها تعدي / والمركبة سكرانة
البحر .. :
البحر مليان حواري
وأكمنة / ومتاهات
والأمنيات .. :
الأمنيات نادت على الأحلام
واقفين سوا كوورس
والغنوه عن طوق النجاه
الحوت .. :
الحوت هناك / لساه آمين
بس مين يشبه ليونس
ومعادش زيه طيبين
ولا عاد هناك ياقطين
يداوي الجرح في اللفه
كل اللي فات / فتح الكتاب
وعدى لشطه يدفى
كل اللي مات / قبل الغرق
كسر الدفه
……………………………….
بقلم الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.