عم السيد بقلم حسن أبو عرب محمد ..الحواوشه ..المنصوره الدقهليه
كان طيب كان راجل عادى
كان حامد ربه وكان راضى
على رزقه بيسعى و بينادى
ياخلق تكالناعلى الهادى
كان صوته بجلجل فى الشارع
أاصلح بواجير الجاز
على كتفه الشنطه وكان سارح
من قبل مايخترعوا الغاز
كان يفرش فى الحاره حدانا
فى رحاب الناس الشقيانه
جايبين لُه البواجير هلكانه
مسدوده الفُونيه وعطلانه
مفكوكه الكُوشه وخربانه
أنا فاكر شكلُه ونضارتُه
كات كعب إزاز
فى بلدنا الستات عارفِينُه
دكتور فى الصنعه حَبِينُه
داعيِّن المولى انِّ يعينُه
ودى خالتى سنيَّه أم الباز
جَيبالُوا كام شقه طَرِيه
والحادِق وياه ملوخيه
من بيتها وكات لقمه هنيه
من يطعم شقيان قد فاز
بيولع فى وابورُه يئِيدُه
والعِده يجهِزهَا بإيده
على شُغلُه يتَمِّم ويعيدُه
ويحل جميع الألغاز
كان لسه براح الكون صافى
وبرغم الحُوجَه الخير كافى
وصباح النور حاضنه عوافى
ولاكنش مابينا أى شواذ
أو صوت لنشاذ
أو واحد ضايع ملهوش عاز
كات لسه الخلق على الفطره
والمولى ملاذ…
التعليقات مغلقة.