معني السلام…
بقلم الشاعر فهمى محمود حجازى
معني السلام
دونوا عنى الكلام
وافهموا معنى السلام
السلام مش رمز ..
أو صورة حمام
السلام أمن وتسامح..
مش مسكن ع الدوام
مش نطبطب ع اللي سارق..
أو نطبطب ع الجبان
ويبقى بينا الحق نام
السلام ماهوش بيان..
نشجب نندد ..
لما نلقى الظلم عام..
فوق بحور الانسانية
والحق ضاع وسط الظلام
ده .. مش سلام
ده اسمه ضعف..
واحنا بنزوق كلام
لما الطفولة تنتهك..
ويتقتل بينا الرضيع..
ويا الغلام.. ده.. مش سلام
لما الحراير عرضهم بيُنتهك
واحنا حاطين فوق ضميرنا ميت لجام
السلام لما اللي واخد عهد منك بالأمان
جوه بيته يعرف ينام
مش تبقى سارق منه أرضه
ومستبيح حتى في عرضه
وطرده نايم فى الخيام
وجاي تقولي ده سلام
طب سلام .. ع اللي شاهد ..
و ع اللي مسروق ع الدوام
واللي مسروق منه حقه وسط الزحام
واللي سارق منه حقه مكبله بكلمة سلام
- بقلم الشاعر محمود حجازى.
التعليقات مغلقة.