(أنا موش ملاك)
بقلم/ مدحت رياض
صاحبي اللي غايب من سنين
بسؤال في عينه وكلمتين
وانا حافظه رغم البعد
والنبض الحزين
وقريت كلامه ف نظرته
وسؤاله كان هو انت مين؟
صاحبي اللي كان زي الجبل
ولا يوم يميل ،
والنخل يسهر لجل ما يضلل
على الشعر الجميل
يغزل حروفه لكل قلب
ملاذ وبيت
طب قولي ليه فجأة اختفيت ؟
يا صاحبي قرب خطوتين
نفس الملامح بس تعبت
م السفر جوة النفوس
موش كل رزق الناس فلوس
الناس بتهجر بعضها
وبقينا في الآخر تروس
وانا قلبي مهجور من زمن
صدقني موش بدفع تمن
اتا عمري ما كنت السبب
في دموع عيون
وبرغم ذلك
كنت مقتول م الظنون
يمكن اكون اصلا غلط
مانا موش ملاك
ومنيش كمان شيطان رجيم
واذا كنت من جنس البشر
فأنا موش سليم
انا نفس بتلوم نفسها
في كل الحالات
انا زهرة عطشان قلبها
والغصن مات
انا فيا شئ جوة انكسر
ونزيفه كان طبعه السكات
ايه باقي من طعم البيوت
غير ذكرى بتعافر تعيش
وسؤال غريب عن قلب صافي
جوابه كان دايما مفيش
صدقني يا صاحبي القديم
كل القديم بقى تحفة
تنحط في مزار
والقلب مكسور أو سليم
بنداري بشوية هزار
ونصيحتي خليك زيي انا
وانا وسط ناس
مهما الألم زاد قسوته
ميهزنيش
والموت قابلته في سكته
مثلت انه مبكانيش
اما الحقيقة في أصلها
مع نفسي موش قادر اعيش
التعليقات مغلقة.