حسن أبوعرب ..عِشق نارها
لَما تشُوفَك تبتِسِم
والضِحكَه صافيَه تِترِسِم
عَاملَه ملَاك!!
نَظرِة عينيها تخدَعَك
تحلِف على الحُب دا
مليون قَسَم
وانِ مفيش فى قلبَها
غِيرِى أنا
والحُب ما بينَّا اتقسَم
وانى نصِيبهَا وحَظَّهَا
بعد العذاب
بعد الألم
خَلَّتنِى أعشق اسمَهَا
خلتنى أوصل للقمم
وبَقَت حياتى ودنيتِى
والحب واقِع واتحَسَم
أتارِى البسمه والضحكه
شِبَاك ملهاش عدد !!
دنيا تشُوف فيها العجب
شَبَكِت قلوب ياما كتير
الأولى هِيَّ فى الخِدَاع
حَصَدِت جوايز من دهب
خلَتنِى كارِه دنيتى
عايش شريد
مع قلب للدنيا زهد
منها هرب
والروح مفارقَه للجسد
صابها العطش
صابها الجَدَب!!
فاوعاك ياصحبى تنخَدَع
بعِشق نارها
وتكون ضحيه والحطب
آسف لأنى لعَنت كُل ضحكه
وشئ جميل
دى النار بتحرق
م الغضب
دى النار بتحرق
م الغضب
التعليقات مغلقة.