ست الحلوين …
بقلم فاطمة علام
( ست الحلوين)
الحلم اللي اتكعبل
فى يومين
كان رايح فين؟
والقلب المتصبر لسنين
بعيون حلمك
لو تاه عنك
هيجيب الصبر الباقى منين ؟!!
حبيتك ؟!
طبعا حبيتك
وبقيت قلبك
نبضك
بيتك
من أول لحظة ماقابلتك
حسيت بحنين
واتحرك عشقك جوايا
وكأنه جنين
فازاى تعشقنى وتخدعنى
وانا اخيب فيك
شكى وظنى
واقول معلش يابطوطة
يمكن تعبان
أتاريك تعبان
تعصر قلبى
وبصدق كدبك
من غلبى
واغفر لك دايما
هجرانك
ودموع العين
الحلم
اللى اتكعبل فورا
كان رايح فين
مش برضه عيونى
وروح روحى
والا جروحى
إياكش فاكرنى
من المساكين
طب فوق واسمعنى
وفوق حبة
طرطأ ودنك
ياجدع ياحزين
انا بنت البحر اللي يشيلك لما تحسه
ويهدهد روحك
ويناغشك
لما تمسه
إنما لو تلعب ألاعيبك
راح يغضب وفى لحظة يسيبك
مسحوب لسنين
أنا مهما حياتى تعذبنى
وظروفى تودينى
تجيبنى
غصبن عن عينك
عن قلبك
هفضل بطة
ست الحلوين
أيوه أنا بطه
ست الحلوين
التعليقات مغلقة.