مونولوج “انا شاعر غير محظوظ ” …
أشرف يوسف علي
مونولوج
أنا شاعر غير محظوظللشاعر : أشرف يوسف علي
أنا شاعر ليه غير محظوظ؟
مش بطلب أكتر ما بعوز
مع إني ضليع في الأوزان
والقافيه وكلماتي كنوز
وبغني علي قلة بختي
في الدنيا وضارب ميت بوز
علشان اللي بحسوا بقولوا
قالوا دقه قديمه وعجوز
عايزني أغير إحساسي
ومشاعري والعب أرجوز
وانسي اللي سمعته من ورده
ونجاة وحوريه وفيروز
وبدال ما اسمع عبد الوهاب
أسمع شيكا بيكا وكلبوظ
كل دا في زمانهم آه ممكن
واكتر من كدا طبعا بيجوز
والمطرب تلاقيه يتنطط
عالزيطه ويرفس بالجوز
واحنا اللي علي الرف ركنا
من بدري وبنأشر موز
وبقينا بالعكس بنمشي
في الدنيا وشعرنا منبوذ
الناجح يسقط لا مؤاخذه
والفاشل هو اللي يفوز
شكرا ياشباب هشك بشك
والعدله ف إيدكم بتبوظ
جه زمن الحمو و البيكا
ونسيتوا الموجي و محفوظ
يخرب بيت أم اللي اختاركوا
في الدنيا وخلاها حظوظ
يخرب بيت أم اللي اختاركوا
في الدنيا
وخلاها حظوظ
الثلاثاء بتاريخ ٢٠٢٢/٨/١٦م
بقلم الشاعر : أشرف يوسف
التعليقات مغلقة.