ايه حكايتك…شعر اشرف الشناوى شاعر عاميه المنصوره البرامون
ايه حكايتك بس قولى
لما تضحك بالقى قلبى
جاى يقولى
والقى كل الكون سعاده
لما تضحك قهوتى
بتقلب زياده
ايه حكايتك بس قولى
كلى عاشقك حتى ضلى
جاى بيدلى بالشهاده
ان عشقك عدا مرحلة
العباده
ايوا شوفتك جوا منى
حلم دايما بيشاغلنى
وبالالاده
كل ماهرب منه بارجع
غصب عنى مش بعاده
ايه حكايتك بس قولى
وبشياكه
انت جاى تحتل قلبى
والا تفرض فى السياده
ابنى سور السجن على
ماانت وحدك جيش وقاده
قلبى عايش وفى براحك
رغم أنه بعيش جراحك
ايه حكايتك بس قولى
لسه ليه رافع سلاحك
ماانت عارف انه رافض
انه يمضى قرار صراحك
او يسيب سجنك ويطير
ايه حكايتك بس قولى
امتى هتفك الاسير
لجل مايطير يوم ويغنى
وسط أحلامه الكتير
ايه حكايتك بس قولى
والا دا الحكم الاخير
انى افضل جوا سجنك
مستحيل ابدا اطير ………….
التعليقات مغلقة.